တည်ဆောက်မှုဝါဒ (Constructivism) နှင့် ပညာရေး

ပညာရေးမှာ ကျောင်းသား သို့မဟုတ် လေ့လာသူဟာ အပြုခံသဘော၊ လိုက်နာမှတ်ယူတဲ့ အနေအထားမှာပဲ ဆိုရင် အထက်အောက်ဖိစီးမှုကို အားပေးရာရောက်ပါတယ်။

ကျောင်းသားဟာ ကျောင်းက ဆရာ၊ ဆရာမတွေ သင်ကြားထားသမျှကို လိုက်နာမှတ်ယူပြီး အဲဒီ အသိပညာဘောင်ထဲမှာပဲ ရွေ့လျားမနေတော့ပါဘူး။ ကျောင်းသားဟာ သူ့ကို ပြဌာန်းထားတဲ့ အဓိပ္ပာယ်တွေကို သူရွေးချယ်ချင်းမရှိဘဲ လက်ခံကျင့်သုံးတာဟာ အထက်အောက်ဖိစီးမှု(hierarchy) ကို အားကောင်းစေပါတယ်။

ကျောင်းသားတစ်ယောက်အနေနဲ့ သူသင်ကြားနေတဲ့ ဘာသာရပ်တင်သာမက ကျင့်ဝတ်တွေ၊ ဒဿနတွေ၊ ဓလေ့ထုံးစံတွေရဲ့ အဓိပ္ပာယ်တွေနဲ့ သက်ရောက်မှုတွေကို သူဖော်ထုတ်ခွင့် မရတဲ့အခါမှာ သူ့ရဲ့ အတ္တဆောက်တည်မှုက ဘောင်အတွင်းထဲကိုသာ ရောက်သွားနိုင်ပါတယ်။

လွှမ်းမိုးအုပ်ချုပ်သူတွေ အနေနဲ့လည်း သူတို့ဦးတည်ရာကို လိုက်ပြီး ပညာရေးကို ပြဌာန်းနေတာကြောင့် အုပ်ချုပ်သူတွေရဲ့ ပြဌာန်းစာအုပ်ထဲကနေ ထွက်ပြီး ကျောင်းသားတွေကို ပေးသွားခွင့် ရှိမရှိပေါ်ကို သက်ရောက်နိုင်ပါတယ်။

ဥပမာအားဖြင့် သင်ရိုးညွှန်းတမ်းတွေဟာ စံနှုန်းချိန်ကိုက်ထားတဲ့၊ အသေသဘောသက်ရောက်နေတဲ့ စာအုပ်တွေကိုသာ အဓိက ဗဟိုထားမယ်ဆိုရင် ကျောင်းသားတွေကလဲ အဲဒီစာအုပ်ထဲက အကြောင်းအရာတွေကိုပဲ အားရုံစူးစိုက်သွားမှာပါ။ အဲဒီအခါမှာ သူဟာ အပြင်လောကနဲ့ သူစံပြုထားတဲ့ စာအုပ်တွေ ကိုက်ညီမှုရှိမရှိ၊ ထိုစာအုပ်ထဲက အကြောင်းအရာတွေကို အပြင်လောကမှာ အသုံးပြုနိုင်မှု ရှိမရှိကိုလည်း စောဒက တက်ချင်တော့မှာမဟုတ်ပါဘူး။

ယနေ့အချိန်အခါမှာ ပညာရေးဟာ ကျောင်သားတွေကို အတွေးအခေါ်ဗေဒတွေ၊ ဒဿနာတွေ၊ မူဝါဒတွေ ရိုက်သွင်းတာထက် ကျောင်းသားတွေဆီကနေ ထုတ်လုပ်မှုကို အခြေခံထားတာက လက်ရှိအုပ်ချုပ်သူတွေရဲ့ ယန္တရားကို အားကောင်းစေပါတယ်။ စီးပွားရေးရဲ့ ရုပ်ပိုင်းဆိုင်ရာ အခြေအနေတွေနဲ့ နိုင်ငံရေးရဲ့ အတွေးအခေါ်ပိုင်းဆိုင်ရာ ဖန်တီးမှုတွေက အုပ်ချုပ်ရေးစနစ်တွေကို အဆုံးအဖြတ်ပေးလာနိုင်တဲ့ အခြေအနေမှာ ဖန်တီးမှုနဲ့ ထုတ်လုပ်မှုဟာ အရေးပါလာပါတယ်။

ဒီဖန်တီးမှုနဲ့ ထုတ်လုပ်မှုတွေကို သမရိုးကျ ပညာရေးစနစ်က မဖြည့်ပေးနိုင်တဲ့အခါ ကျောင်းသားတွေရဲ့ ဖန်တီးမှုနဲ့ နောက်လာမည့် ထုတ်လုပ်မှုတွေ အားကောင်းရေးအတွက် ကျောင်းသားတွေကိုယ်တိုင် ပါဝင်ပြဌာန်းရမည့် ပညာရေးဟာ လိုအပ်လာပါတယ်။ တည်ဆောက်မှုဝါဒ (constructivism) အရ ကျောင်းသားတွေရဲ့ ကိုယ်တိုင် ပတ်ဝန်းကျင်အပေါ် အဓိပ္ပာယ် တည်ဆောက်ပြီး နားလည်မှုတွေကို ကိုယ်တိုင်လုပ်ယူလာရပါတယ်။

ပုဂ္ဂလိကဝါဒ အားကောင်းတဲ့ အနောက်တိုင်းမှာ တစ်ဦးချင်း အဓိပ္ပာယ်တွေကို ပုံဖောက်ပေးတဲ့ တည်ဆောက်မှုဝါဒကလည်း အားကောင်းလာပါတယ်။ အဲဒါနဲ့အတူ ပုဂ္ဂလိကဝါဒနဲ့ ခွဲခြားရခက်တဲ့ လစ်ဘရယ်ဝါဒကလည်း တည်ဆောက်မှုဝါဒကို အားကောင်းစေရေးအတွက် တွန်းအားတွေ ပေးလာပါတယ်။

ဆရာတွေရဲ့ အခန်းကဏ္ဍကလည်း တော်တော်လေး ကွဲပြားလာပါတယ်။ တည်ဆောက်မှုဝါဒမှာ ဆရာတွေအနေနဲ့ ကျောင်းသားတွေကို ထိန်းကျောင်းဖို့ တာဝန်ကလည်း နည်းသထက် နည်းလာပါတယ်။ ဆရာတွေအနေနဲ့ ပုံစံသွင်းဖို့ထက် ကျောင်းသားတွေရဲ့ ရုပ်ပိုင်းဆိုင်ရာ၊ စိတ်ပိုင်းစိတ်ရာ ခံစားမှုတွေကို နားလည်ဖို့က အရေးကြီးလာပါတယ်။ ဒါပေမဲ့ စာသင်ခန်းတွင်း သင်ကြားရေးအားကောင်းရေးနဲ့ စီမံခန့်ခွဲရေးတို့အတွက် ဆရာတွေက လိုအပ်နေဆဲပါ။

ဆရာတွေအနေနဲ့ သင်ကြားရေးအတွက် စံသတ်မှတ်ထားတဲ့ သင်ရိုးစာအုပ်ထက် ကျောင်းသားတွေရဲ့ လက်တွေ့ခံစားနေရတဲ့ ပြဿနာတွေပေါ် မူတည်ပြီး ထွက်ပေါ်လာတဲ့ ရလဒ်တွေကိုသာ အထူးပြုရပါမယ်။

တည်ဆောက်မှုဝါဒကို ဟာ့က်နက်စ် (Harkness) ဆွေးနွေးမှုနဲ့ ဆက်စပ်လို့ရပါတယ်။ ဟာ့နက်စ်လို့ နာမည်ပေးရတာက (၁၉၃၀)ခုနှစ်ဝန်းကျင်လောက်မှာ အက်ဒွပ်ဟာ့က်နက်စ်လို့ ခေါ်တဲ့ ပုဂ္ဂိုလ်ထောက်ပံ့ထားတဲ့  Phillips Exeter Academy က တီထွင်လိုက်တဲ့ သင်ကြားရေးပုံစံတစ်မျိုးဖြစ်ပါတယ်။ အဲဒီမှာ ဆရာနဲ့ ကျောင်းသားတွေဟာ စားပွဲမှာ ဝိုင်းထိုင်ကြရပါတယ်။ ကျောင်းသားတွေက အချင်းချင်းဆွေးနွေးပြီး ဆရာက ညွှန်ကြားချက်လောက်ပဲ ပေးရပါတယ်။

ဆရာရဲ့ တာဝန်က ဆွေးနွေးဖို့ ခေါင်းစဉ်ရှာပေးခြင်း၊ ဆွေးနွေးမှုကို လှုံ့ဆောင်ပေးခြင်းနဲ့ ထိန်းကျောင်းခြင်းတွေကိုသာ ပြုလုပ်ရပါတော့တယ်။ ဆရာအနေနဲ့ သူယူဆထားတဲ့ တန်ဖိုးတွေ၊ အဓိပ္ပာယ်တွေကို ပြဌာန်းပိုင်ခွင့်မှာ နည်းသွားပါတယ်။ ကျောင်းသားတွေအနေနဲ့ သူတို့ရဲ့ အတွေ့အကြုံတွေ၊ အမြင်တွေနဲ့ အဓိပ္ပာယ်သစ်တွေကို ရှာဖွေရပါတယ်။

တည်ဆောက်မှုဝါဒကြောင့် ပုဂ္ဂလိကဝါဒတွေအားကောင်းလွန်းပြီး လူမှုရေးတာဝန်ယူမှုတွေ အားနည်းသွားမယ်လို့ ဝေဖန်ကြပေမယ့် ဟာ့က်နက်စ်လိုမျိုး ဆွေးနွေးမှုမျိုးက စုပေါင်းနားလည်မှုကို ပြန်လည်မွေးထုတ်နိုင်မယ်လို့ ယူဆကြပါတယ်။

ဒါပေမဲ့လည်း ကိုယ်ပိုင်အဓိပ္ပာယ်တွေနဲ့ ခံစားမှုတွေကို ရှေ့တန်းတင်ထားတာကြောင့် အယူအဆချင်း မျှဝေမှုကိုတော့ အနည်းနဲ့ အများထိခိုက်နိုင်ပါတယ်။ အစုအဖွဲ့တွေနဲ့ ပိုမိုဝေးသွားနိုင်ပေမယ့် ဥပဒေနဲ့ စည်းမျဉ်းတွေက တစ်ဦးချင်းပေါ်ကို ထိန်းချုပ်နိုင်ပါသေးတာကြောင့် ကျွန်တော်တို့ထင်ထားသလို တစ်ဦးချင်း ဖန်တီးမှုကို အတိုင်းအဆမရှိ မြင့်တင်နိုင်မယ်လို့တော့ မဟုတ်လှပါဘူး။

ဒါကြောင့် တည်ဆောက်မှုဝါဒမှာ စုပေါင်းလုပ်ကိုင်မှုကို အားနည်းနိုင်ပေမယ့် ဖန်တီးမှုနဲု့ထုတ်လုပ်မှုကို အားပေးထားတာကြောင့် ကုန်ထုတ်စွမ်းအားအရကြည့်ရင် လိုအပ်တဲ့ ပညာရေးစနစ်မျိုးပါပဲ။ တန်ဖိုး၊ အဓိပ္ပာယ်နဲ့ နားလည်မှုတွေကို ပြဌာန်းတာက နည်းပါးသွားနိုင်တာကြောင့် အထက်အောက်ဖိစီးမှုကို တွန်းလှန်နိုင်ပါတယ်။

ဒီမိုရေစီရပ်ဝန်းထဲမှာ ရုပ်ပိုင်းဆိုင်ရာ၊ အတွေးအခေါ်ပိုင်းဆိုင်ရာ အားကောင်းဖို့အတွက် တည်ဆောက်မှုဝါဒက လိုအပ်တဲ့ ပညာရေးစနစ်တစ်ခုပါပဲ။

တိမ်ပြာ
source.... Maukha