စိန်အလွမ်း
ကျွန်တော်သည် အခြားစာရေးဆရာ အတော်များများလိုပင် တက္ကသိုလ် နောက်ခံဝတ္ထုများ၊ ကဗျာများ ရေးခဲ့ပါသည်။ စာရေးဆရာ ဖြစ်ခါစမှာ ရေးခဲ့သော လုံးချင်းဝတ္ထုများမှာ တက္ကသိုလ်အကြောင်းအရာတွေ များပါသည်။ လူငယ်စာရေးဆရာအတော် များများသည် စာရေးခါစတွင် တက္ကသိုလ်အကြောင်း ရေးကြတာများကြောင်း တွေ့ရသည်။
ဘာကြောင့် ဒီလိုဖြစ်ရသလဲဟု ကျွန်တော့်ကိုယ် ကျွန်တော် ဆန်းစစ်ကြည့်မိ၏။ အချက်နှစ်ချက်ကို တွေ့သည်။
ပထမအချက်က ဘွဲ့ရလို့ တက္ကသိုလ်နယ်မြေကို စွန့်ခွာခဲ့ရသော်လည်း တသသ စွဲလမ်းနေဆဲဖြစ်၍ အလွမ်းပြေ ရေးမိခြင်း။
ဒုတိယအချက်ကတော့ ကိုယ်ကျွမ်းကျင်ပိုင်နိုင်သော နေရာဒေသဖြစ်၍ သရုပ်ပေါ်အောင် ရေးသားနိုင်ခြင်း။
အထက်ပါ အချက်နှစ်ချက်စလုံးသည် တက္ကသိုလ်နောက်ခံ ၀တ္ထုများ ရေးသာရာမှာ ကျွန်တော့်အတွက် များစွာ အထောက်အကူ ပြုခဲ့လေသည်။
ကျွန်တော်သည် ရန်ကုန်တက္ကသိုလ်မှာ လေးနှစ်ခွဲလောက် ကျောင်းတက်ခဲ့သည်။ ထိုကာလမှာ ကျွန်တော့်ဘ၀ သက်တမ်းတစ်လျှောက် အပျော်ရွှင်ဆုံး၊ အတက်ကြွဆုံး၊ အလွတ်လပ်ဆုံးပင် ဖြစ်၏။
နေ့ကျောင်းသားဖြစ်သော်လည်း တော်ရုံတန်ရုံ အဆောင်ကျောင်းသားတွေထက် ပိုပြီး ကျောင်းမှာ နှံ့စပ်သည်။ သိပ္ပံဘာသာတွဲနှင့် ဆယ်တန်းအောင်ပြီးကာမှ တက္ကသိုလ်မှာ ၀ိဇ္ဇာဘာသာ (ဒဿနိကဗေဒ) ယူခဲ့သဖြင့် ၀ိဇ္ဇာဘက်မှာရော သိပ္ပံဘက်မှာပါ သူငယ်ချင်း အပေါင်းအသင်းတွေ ရှိသည်။ ပန်းချီအနုပညာအသင်းနှင့် ဆက်စပ်မိသောအခါ အသိအကျွမ်းက ပိုတောင် များလာသေးသည်။
မနက်စောစော ထမင်းကြော် တစ်ပန်းကန်စားပြီး အိမ်မှထွက်ခဲ့ရာ ကျောင်းထဲမှာပင် တစ်နေကုန်သည်။ ညမိုးစုပ်စုပ်ချုပ်မှ အိမ်ပြန်ရောက်တတ်သည်။ တစ်ခါတစ်ရံ ကျောင်းမှာပင် အိပ်တတ်သည်။
ကျောင်းထဲက ကျွန်တော် အိပ်ဖူးသော နေရာများမှာ ရွှေဘိုဆောင်၊ ပဲခူးဆောင်၊ ဒူးယားဆောင်နှင့် စက်မှုတက္ကသိုလ်အဆောင်များ ဖြစ်၏။ အဆောင်တွေမှာသာမက တခြားနေရာများမှာလည်း အိပ်ဖူးသေးသည်။ ပန်းချီအနုပညာအသင်းက ပိုင်သော ပန်းချီခန်းမ၊ သော့ပျက်နေသော စာသင်ခန်းများမှာ။
ထိုမျှမက “တက္ကသိုလ်မှာ ငါတို့ မအိပ်ဖူးတဲ့နေရာ မရှိစေရအောင်၊ နောင် အမှတ်တရ ပြန်ပြောလို့ရအောင်” ဆိုပြီး ဘွဲ့နှင်းသဘင်ခန်းမရှေ့က ကျောက်လှေကားပေါ်မှာ ပုဆိုးလေးခြုံပြီး ကွေးခဲ့ဖူးသည်။ ကံ့ကော်တောက ခုံတန်းလျားတွေပေါ်မှာလည်း ငိုက်ခဲ့ဖူးသည်။ သူငယ်ချင်း ကဗျာဆရာတစ်ယောက်နှင့် အတူ တစ်ညလုံး အဓိပတိလမ်းပေါ်မှာ ပက်လက်လှန်ပြီး ကြယ်တွေကို ကြည့်ခဲ့ကြဖူးသည်။ လုံခြုံရေးဝန်ထမ်းတွေက ကျွန်တော်တို့ကို မြင်တော့ လူနှစ်ယောက် ကားကြိတ်ခံရပြီး လဲနေတာမှတ်လို့ လာကြည့်ကြတာ မှတ်မိသေးသည်။
ကျွန်တော်တတို့ သူငယ်ချင်းအုပ်စုမှာ သူများတွေထက် ထူးတာ တစ်ခုရှိသေးသည်။ မိန်းကလေးဆောင်တစ်ဆောင်မှာ တစ်ညအိပ်ဖူးခြင်းပင်ဖြစ်၏။
ထိုစဉ်က စီးပွားရေးတက္ကသိုလ် ကျောင်းသူများနေသော အင်ကြင်းဆောင်၏ အဆောင်မှူးမှာ ကျွန်တော်၏ ငယ်ဆရာမဖြစ်သည်။ သူတို့အဆောင်မှ နံရံကပ်စာစောင်ထုတ်လျှင် ကျွန်တော်က ပန်းချီအသင်းမှ သူငယ်ချင်းများနှင့်အတူ သွားရောက် တာဝန်ယူ လုပ်ကိုင်ပေးရသည်။
တစ်ခါတော့ ညမိုးချုပ်သည်အထိ နံရံကပ်စာစောင်က မပြီးသေးဘဲ ဖြစ်နေ၏။ နောက်တစ်နေ့မှာ ၀ါဆိုသင်္ကန်းကပ်ပွဲ ရှိသည်။ နံရံကပ်စာစောင်ကိုလည်း တစ်ခါတည်း ခင်းကျင်းပြရမည်ဖြစ်၏။ ဆရာမက ပြီးအောင်သာ လုပ်ဟု ဆိုသည်။
ထို့ကြောင့် အားကြိုးမာန်တက် လုပ်ကြရာ ညဆယ့်နှစ်နာရီ ထိုးခါနီးမှပြီးသည်။ အိမ်ပြန်ကြဖို့ မဖြစ်နိုင်တော့။ သို့ဖြင့် အဆောင်မှူး ဆရာမ၏ ဧည့်ခန်းထဲမှာ စုအိပ်ကြရသည်။ တံခါးတွေကိုတော့ အပြင်ကနေ အလုံပိတ်ပြီး သော့ခတ်ထားသည်။ ဘာပဲဖြစ်ဖြစ် ကျွန်တော်တို့သည် ထူးထူးခြားခြား မိန်းကလေးဆောင်မှာ ညအိပ်ခဲ့ဖူးသည်ဟု ကြွားစရာတစ်ခုတော့ ကြုံခဲ့ရလေသည်။
……………………………………………
ဘယ်ခေတ်မှာပဲဖြစ်ဖြစ် တက္ကသိုလ်ကျောင်းသားဘ၀သည် ပျော်စရာကောင်းသည်ချည်းပင် ဖြစ်ပါလိမ့်မည်။ သို့တိုင်အောင် ကျောင်းသားတိုင်း ကျောင်းသူတိုင်းက ကိုယ့်ခေတ်သည် ပျော်စရာအကောင်းဆုံးဟု ထင်ကြမှာ သေချာသည်။ ကျွန်တော်ကလည်း ကျွန်တော်တို့ခေတ်သည် ပျော်စရာအကောင်းဆုံးဟုပင် ဆိုချင်သည်။
ကျွန်တော်တို့ ကျောင်းတက်ခဲ့သည့်အချိန် ၁၉၇၂ – ၁၉၇၇ မှာ စရိတ်စက အလွန်သက်သာသော ကာလဖြစ်၏။
ပထမနှစ် စတက်သော ၁၉၇၂ တွင် လက်ဖက်ရည်တစ်ခွက်မှ သုံးဆယ့်ငါးပြားသာ ရှိသေးသည်။ ဒူးယားစီးကရက်တစ်လိပ် ဆယ့်ငါးပြားဖြစ်၏။ တစ်နေ့လျှင် အသုံးစရိတ် တစ်ကျပ်၊ ငါးမတ်လောက်သာ ကုန်ကျသည်။ ကျောင်းလခက တစ်လ ဆယ့်ငါးကျပ်ဖြစ်ပြီး နှစ်လတစ်ကြိမ် ပေးသွင်းရသည်။ အဆောင်နေသည့် ကျောင်းသားကမှ တစ်လ လေးဆယ့်နှစ်ကျပ်လား ပေးရသည်။ ထမင်းနှစ်နပ် ကျွေးသည်။ နေ့လယ် ကော်ဖီနှင့် မုန့်တိုက်ကျွေးသေးသည်။ (အဆောင်ဟင်း မကောင်းတာကတော့ ဘယ်ခေတ်မှာပဲဖြစ်ဖြစ် အတူတူပင် ဖြစ်လိမ့်မည်ထင်၏။)
နေ့ကျောင်းသားတွေကလည်း အဆောင်က သူငယ်ချင်းများနှင့် လိုက်သွားပြီး အဆောင်ထမင်းဟင်းကို ခပ်တည်တည် ၀င်စားလို့ရသည်။ ဘယ်သူကမှ ဟန့်တားခြင်းမရှိ။ နောက်ပိုင်း ကုန်ဈေးနှုန်းတွေ ကြီးလာတော့မှ ထမင်းစားလက်မှတ်တွေ ဘာတွေ ပေါ်လာခြင်းဖြစ်၏။
တစ်ခုတော့ ရှိသည်။ ထိုအချိန်က ဇိမ်ခံပစ္စည်း အလွန်ရှားခြင်းပင် ဖြစ်လေသည်။ မော်တော်ကား၊ ရေဒီယို၊ ကက်ဆက် စသည်တို့သာမက ဆပ်ပြာမွှေး၊ သွားတိုက်ဆေးတို့လို အိမ်သုံးပစ္စည်း အသေးအဖွဲကလေးတွေတောင် ဇိမ်ခံပစ္စည်းစာရင်းထဲ ပါနေသည်။
အ၀တ်အစားလည်း အလွန်ရှားသည်။ တက်ထရွန်အင်္ကျီ အဖြူကလေးတစ်ထည်လောက်၊ အစင်းကလေး အကွက်ကလေး တစ်ထည် နှစ်ထည်လောက်နှင့် ပြီးသည်။ တက္ကသိုလ် ကျောင်းသားကျောင်းသူများမှ အရပ်ထဲက သူလိုငါလို လူများကဲ့သို့သော ၀တ်စားဆင်ယင်ကြသည်။ ကျောင်းထဲမှာ ဖက်ရှင်ပြပွဲလို အပြိုင်အဆိုင် ၀တ်စားကြတာမျိုး သိပ်မရှိ။ အ၀တ်အစား ဒီဇိုင်းဆန်းဆန်း ခပ်ကြောင်ကြောင် ၀တ်လာလျှင် ၀ိုင်းအဟား ခံရဖို့များသည်။
ကျောင်းသူများအနေနှင့် စကတ်ဝတ်ဖို့ မပြောနဲ့ ထဘီကို ခြေသလုံးပေါ်အောင် ၀တ်မိလျှင်ပင်
“ကောက်စိုက်မလို့လားဟေ့”
“ခြေသလုံးမှာ မျှော့ကြီး မျှော့ကြီး” ဟု ၀ိုင်းအော်ခံရမှာ သေချာသည်။
ကျောင်းသူတွေ ဖက်ရှင်ဒီဇိုင်းပြပွဲလို အ၀တ်အစား အသစ်အဆန်း ၀တ်လို့ရသော နေ့တစ်နေ့တော့ ရှိသည်။ ဘွဲ့နှင်းသဘင်နေ့ မတိုင်ခင် အပြီးသတ် အစမ်းလေ့ကျင့်သော နေ့ပင်ဖြစ်၏။ တကယ်ဘွဲ့ယူရမည့်နေ့တွင် အပေါ်က ဘွဲ့ဝတ်စုံကြီး ၀တ်ထားရမည်ဖြစ်၍ အထဲက ၀တ်ထားတာ ပေါ်မည်မဟုတ်။ ထို့ကြောင့် အစမ်းလေ့ကျင့်သည့်နေ့မှာ အစွမ်းကုန် ၀တ်စားလာကြသည်။ ကျွန်တော်တို့ ကျောင်းသားတွေကလည်း ဖက်ရှင်ပြပွဲ ကြည့်သလိုကြည့်ပြီး အော်ဟစ်အားပေးကြလေသည်။
ထိုစဉ်က မော်တော်ကားတွေလည်း ခုလို မများလှသေး။ ကိုယ်ပိုင်ကားနှင့် ကျောင်းတက်နိုင်သူ အနည်းငယ်သာ ရှိသည်။ ကိုယ့်ဘာသာ ကားမောင်းပြီး ကျောင်းကို လာနိုင်သူဆိုလျှင် လက်ချိုးရေလို့ ရပြီး လူတွေက ထူးထူးခြားခြား မှတ်မိနေတတ်သည်။
……………………………………..
အများစုမှာ တက္ကသိုလ်ကျောင်းသား ကျောင်းသူဆိုပြီး သုံးလိုက်ဖြန်းလိုက် ၀ါဝါကြွားကြွား မနေနိုင်ကြ။ တချို့မှာ ကျောင်းစရိတ်ကာမိအောင် အလုပ် လုပ်ကြရသေးသည်။ ကျွန်တော်သည်လည်း တစ်ဖက်မှ စာအုပ်လုပ်ငန်းကို လုပ်ရင်း ကျောင်းတက်ရသူဖြစ်၏။
သို့တိုင်အောင် မပြည့်စုံသော အခြေအနေကို မညည်းမညူကြ။ ကျောင်းဝင်းထဲကို ရောက်သည်နှင့် အဆင်မပြေတာတွေ အားလုံးကို မေ့သွားကြရသည်။ ငါတို့ပိုင်သော နယ်မြေထဲရောက်ပြီဆိုပြီး စိတ်ထဲက အလိုလို လုံခြုံစိတ်ချသွားကြရသည်။ ကျောင်းတော်ကြီးကို မိမိတို့ ဘိုးဘွားအစဉ်အဆက်က ပိုင်ဆိုင်လာခဲ့သော ခြံဝင်းကျယ်ကြီးလို တွယ်တာသည်။ သစ်ပုပ်ပင်ကြီးကိုပင် ကိုယ့်အဘိုးကိုယ်တိုင် စိုက်ခဲ့သလို အောက်မေ့ကြလေသည်။
ကျွန်တော်သည် တက္ကသိုလ်ကို ကိုယ့်အိမ်လို သဘောထားပြီး နေခဲ့သူဖြစ်၏။ ကျောင်းထဲမှာ လျှောက်သွားရင်း ညဥ့်နက်သွားလျှင် အဆောင်က သူငယ်ချင်းတစ်ယောက် အခန်းမှာ တက်အိပ်လိုက်ရုံသာ ဖြစ်၏။
ကျွန်တော်နှင့် ပေါင်းမိသော သူငယ်ချင်းများမှာလည်း ဘာသာရပ်တူလို့ ပေါင်းမိခြင်းမဟုတ်ဘဲ ၀ါသနာတူချင်း ဆုံမိကြခြင်းဖြစ်၍ ပိုပြီးညီညွတ်သည်။ ကဗျာသမား၊ စာသမား၊ ပန်းချီအနုပညာသမားများ၊ တချို့ဆိုလျှင် ခုချိန်ထိ စာပေနယ်ထဲမှာ လုပ်ဖော်ကိုင်ဖက်များအဖြစ် တတွဲတွဲ ရှိနေတုန်းဖြစ်၏။
ကျွန်တော်တို့အုပ်စုမှာ လူလည်းစုံသည်။ အနယ်နယ်အရပ်ရပ်မှ လာကြသူတွေဖြစ်၏။ အထက်အညာသား (သပိတ်ကျင်း)မှသည် မြိတ်သားအထိ ပါသည်။ ရန်ကုန်တက္ကသိုလ်၊ စီးပွားရေးတက္ကသိုလ်၊ လုပ်သားများ ကောလိပ်၊ ဆေးတက္ကသိုလ်၊ စက်မှုတက္ကသိုလ်တို့မှ ကျောင်းသားများ ဖြစ်ကြသည်။
နောက်ပြောင်သည့် နေရာမှာလည်း ရှာမှ ရှားသည်ဟု ဆိုရမည်။ ဒီအရွယ်ကြီးတွေ ရောက်မှ တက္ကသိုလ်ကျောင်းဝင်းထဲမှာ ဂေါ်လီရိုက်ချင်ရိုက်တတ်သည်။ တုတ်တစ်ချောင်းစီ ကိုင်ပြီး ပင်ပေါင်ဘောလုံးဖြင့် ဂေါက်သီးရိုက်ချင် ရိုက်သည်။
ပန်းချီခန်းမှာ မော်ဒယ်အဖြစ် အသုံးပြုသော အရိုးခေါင်းကြီးတစ်လုံး ရှိသည်။ ၀ါးလုံးနှစ်ချောင်းကို ကန့်လန့်ဖြတ်ချည်၊ ထိပ်မှာ အရိုးခေါင်းစွပ်၊ အ၀တ်နက်တစ်ထည် ခြုံပေးပြီး ညနေ ကျောင်းသူတွေ အဆောင်ပြန်သည့် လမ်းက စောင့်နေသည်။ လာပြီဆိုမှ ခြုံထဲကနေ ဘွားခနဲ ပေါ်လာအောင်လုပ်ပြီး “ဟား ဟား ဟား ဟား” ဟု အသံသြသြကြီးနှင့် အော်သည်။
ကျောင်းသူတွေ လန့်ပြီး အော်ကြသည်။ အဆောင်သူများမှာ အနောက်အပြောင်ခံရပေါင်းများပြီဖြစ်၍ စိတ်မဆိုးကြ၊ သူတို့အဆောင်ကို ယောက်ျားလေးတွေ လာသည့်အခါလည်း သူတို့က ခြေလှမ်းမှားလောက်အောင် ၀ိုင်းဟားကြတာပဲ မဟုတ်လား။
ညဘက်ကျလျှင်တော့ မိန်းကလေး အဆောင်တွေ ရှေ့သွားပြီး သီချင်းဆိုကြသည်။ ဂစ်တာတစ်လက်နှင့် ခေတ်ပေါ်သီချင်းတွေ ဆိုသည့်အခါ ဆိုသည်။ “ဗွေးတုတ်” တို့၊ “နပန်းဆံ” တို့လို သီချင်းတွေကို အုပ်စုလိုက် အသံကုန်ဟစ်ချင် ဟစ်သည်။ ရှိပြီးသား သီချင်းတွေကို စာသားဖျက်ပြီး ဆိုချင်ဆိုသည်။ (မောင့်လပြည့်ဝန်းကို မောင့်လက်ပစ်ဗုံးဟု စာသားပြောင်းဆိုတာမျိုး ဖြစ်၏။)
တစ်ခါတလေ ရန်ကုန်တက္ကသိုလ်က အဆောင်တွေ ရှေ့မှာဆိုရတာ ရိုးအီလာလျှင် လှိုင်နယ်မြေဘက်က အင်ကြင်းတို့၊ ကံကော်တို့ရှေ့မှာ ဖြစ်စေ၊ စက်မှုတက္ကသိုလ် ဂျီဟောရှေ့မှာ ဖြစ်စေ သွားဆိုတတ်သည်။
ကျောင်းသားလူငယ်ပီပီ ပျော်ပျော်ပါးပါး နောက်နောက်ပြောင်ပြောင် နေတတ်သော်လည်း ဟော့ဟော့ရမ်းရမ်းတော့ မရှိကြ။ ကျောင်းသူတွေကို ပျော်စေပျက်စေ နောက်ပြောင်တာမျိုးသာ ဖြစ်၏။ ဣနြေ္ဒပျက်လောက်အောင် မနှောင့်ယှက်ကြ။ တခြားလူက ကျောင်းသူတစ်ယောက်ကို စော်ကားလျှင်လည်း မခံ။ ကိုယ့်နှမကို ထိသလို သဘောထားသည်။
အမိတက္ကသိုလ်၏ ဂုဏ်သိက္ခာကိုလည်း အလွန်တန်ဖိုးထားသည်။ ကိုယ့်ကိုယ်ကိုယ် တက္ကသိုလ်ကျောင်းသားဆိုပြီး စိတ်ကြီးဝင်မိတာမျိုးတော့ အထိုက်အလျောက်ရှိသည်။ ထိုစိတ်ကြောင့်ပင် ကိုယ်ရည်ကိုယ်သွေး မြင့်မားပြီး သိမ်ငယ်ညံ့ဖျင်းသော အပြုအမူ အပြောအဆိုများကို ရှောင်ရှားနိုင်ကြခြင်းမှာလည်း အမှန်ပင်ဖြစ်၏။
………………………………….
ကျွန်တော်သည် တက္ကသိုလ်ပထမနှစ်မှ စ၍ စာပေလောကထဲ ၀င်နိုင်ဖို့ ကြိုးစားနေပြီဖြစ်၏။ ကဗျာတွေ ၀တ္ထုတွေ ရေးပြီး မဂ္ဂဇင်းတိုက်များသို့ ပို့သည်။ ကျောင်းက နံရံကပ်စာစောင်များ၊ နှစ်လည် မဂ္ဂဇင်းများမှာ ကဗျာတွေ ရေးသည်။ သူငယ်ချင်းများစုပြီး လက်ရေးကဗျာစာအုပ်ကလေးများ ရေးသားထုတ်ဝေသည်။
ယုဒသန်မျှော်စင်ထိပ်များမှ တက္ကသိုလ်များဗဟိုစာကြည့်တိုက် မြေအောက်ခန်းအထိ
နှံ့နှံ့စပ်စပ် ရောက်ဖူးခဲ့သဖြင့် တက္ကသိုလ်အကြောင်းကို ပိုင်နိုင်စွာ ဖွဲ့ဆိုနိုင်ခဲ့သည်။
တက္ကသိုလ်၏ အထင်ကရ အဆောက်အအုံ အမှတ်အသားများက ကျွန်တော်၏ ရေးဖွဲ့လို့ အကောင်းဆုံး ဇာတ်ကောင်များပင် ဖြစ်၏။ “နှလုံးသားတို့၏ ပူးတွဲကြေညာချက်” ဟူသော ကဗျာတွင် အောက်ပါအတိုင်း ကျွန်တော်ရေးခဲ့သည်။
သိပ်ချစ်ကြသော
ငါတို့နှစ်ဦး၏ နှလုံးသားကို
လုပ်ကြံရန် ကြံစည်သူသည်
အင်းလျားကန်၏ ၀မ်းဗိုက်ကို
ဓားဖြင့်ခွဲရန် ကြံစည်သကဲ့သို့လည်းကောင်း၊
သစ်ပုပ်ပင်ထိပ်ဖျား၌ သာနေသော
လပြည့်ဝန်းကို
မျက်နှာသစ်ပေးရန် ကြံစည်သကဲ့သို့လည်းကောင်း၊
သထုံဆောင်နှင့် အင်ကြင်းဆောင်ကို ဥမင်လှိုဏ်ခေါင်းတူး၍
ဆက်သွယ်ရန် ကြံစည်သကဲ့သို့ လည်းကောင်း၊
ယုဒသန်မျှော်စင်ကို
ရွှေရည်စိမ်ရန် ကြံစည်သကဲ့သို့လည်းကောင်း၊
ဘွဲ့နှင်းသဘင်ခန်းမပေါ်၌
ဖယောင်းတိုင်သက်စေ့ထွန်း၍
မွေးနေ့ကိတ်မုန့်အဖြစ်
အသုံးပြုရန် ကြံစည်သကဲ့သို့လည်းကောင်း
အလွန်မိုက်မဲလှစွာသော
သူရူးများသာ ဖြစ်လိမ့်မည်တည်း။
…………………………….
တစ်ခုသော နွေရာသီ၏ နေ့တစ်နေ့ကို ကျွန်တော်ဘယ်တော့မှ မမေ့၊ နောက်ဆုံးနှစ် စာမေးပွဲ၏ နောက်ဆုံးနေ့ဖြစ်သော နှုတ်ဖြေမေးခွန်းကို ဖြေပြီးနောက် အဓိပတိလမ်းအတိုင်း ကျွန်တော်လျှောက်လာခဲ့သည်။
ဒီနေ့သည် ကျွန်တော့်အဖို့ တက္ကသိုလ်ကျောင်းသားဘ၀၏ နောက်ဆုံးနေ့။ ကျွန်တော်တို့သည် တက္ကသိုလ်ကျောင်းတော်ကြီးမှာ လေးနှစ်လေးမိုး နေခဲ့သည်။ နောက်တစ်ကြိမ် ပြန်လည်မရရှိနိုင်သော ပျော်ရွှင်ဖွယ်နေ့ရက်များကို ဖြတ်သန်းခဲ့ကြသည်။
အခုတော့ တက္ကသိုလ်နယ်မြေကို ခွဲခွာရတော့မည်။ မျက်လွှာချနေသော မိခင်နှင့်တူသော ဘွဲ့နှင်းသဘင်ခန်းမကြီး။ မကွဲနိုင်သော မှန်တစ်ချပ်ဟု ကျွန်တော်တင်စားခဲ့သော အင်းလျားကန်ကြီး။ မှော်ရုံဟေ၀န်ကဲ့သို့ ညှို့ငင်ဖမ်းစားနိုင်သော ကံ့ကော်တောတို့သည် နောက်မှာ ကျန်ခဲ့ပြီ။
အဓိပတိလမ်းထိပ် မုခ်ဦးတံခါးဝမှာ ကျွန်တော် ရပ်လိုက်သည်။ လွမ်းဆွတ်တသဖွယ်သော ပရိဝုဏ်ကို တစ်ချက်လှည့်ကြည့်သည်။ ထိုစဉ်မှာပင် ကျွန်တော့်ရင်၌ ကဗျာတစ်ပုဒ် ဖြစ်ပေါ်လာသည်။
ရှေ့သို့လှမ်းလျှင်
ခြေရာထင်မည်
အသင် စိုးရွံ့နေသလော။ ။
မင်းလူ
(မြကျွန်းသာမဂ္ဂဇင်း၊ ရန်ကုန်တက္ကသိုလ် စိန်ရတုနေ့ကျောင်းသားများ (ဒီဇင်ဘာ ၁၉၉၅) ၊ အက်ဆေးချစ်သူ (ဖေဖော်ဝါရီ၊ ၂၀၀၁)၊ ရနံ့သစ်မဂ္ဂဇင်း၊ အမှတ် (၂၄)၊ (ဒီဇင်ဘာ ၂၀၁၀) နှင့် ရန်ကုန်တက္ကသိုလ်၊ နှစ် (၉၀) ပြည့် အမှတ်တရ၊ (သြဂုတ်၊ ၂၀၁၁) တွင် ဖော်ပြပါရှိပြီး)
No comments:
Post a Comment