မသိခြင်းကို စားသုံးသူများ
ညီမလေး ချစ်တာ ကိုကို မသိဘူး။
ညီမလေးကို "ညီမလေး ဒါတွေမသိပါဘူး" လို့ပြောရင် မကြိုက်တာ ကိုကို မသိဘူး။
ညီမလေးက ကိုကို့ထက် အသက်ငယ်ပေမယ့် ကိုကိုက မရင့်ကျက်ဘူးလို့ ထင်ခံရတိုင်း နောက်ကျမှမွေးတဲ့ ကံကြမ္မာကို မုန်းတီးမိတယ်ဆိုတာ ကိုကိုမသိဘူး။
ကိုကိုက ရင့်ကျက်တယ်လို့ ထင်တဲ့ ကိုကို့သူငယ်ချင်း မမတွေနဲ့ ယှဉ်ပြီးတွေးခံရတယ်လို့ ထင်တိုင်း ဘယ်သူ့ကိုစိတ်တိုရမလဲ မသိဘူး။
အဲတော့ ခြေကို ဆောင့်ပြီး လောကကြီးကို စိတ်ထဲက အကျယ်ကြီး အော်ဆဲပစ်လိုက်တယ်။ "သေစမ်းပါ။ သွားသေလို့ရတယ်" ဆိုပြီး။
အဲလိုပြောရင်လည်း အဲဒါမရင့်ကျက်တာပေါ့လို့ ကိုကိုက ပြောဦးမယ်မလား။
"ကိုကိုသိတာပေါ့ ညီမလေးရယ်" လို့ ပြောပြီး နှုတ်ခမ်းတွန့်ပြီး ပြုံးလိုက်ရင် အဲဒီအပြုံးက "မင်းကိုငါ အကုန်လုံးသိနေတာလေ" လို့ အဓိပ္ပါယ်သက်ရောက်နေတာကို တအားကို မုန်းတယ်ဆိုတာ ကိုကိုမသိဘူး။
ညီမလေးကို ကိုကို အလွတ်ရတဲ့ ဖတ်စာအုပ်တစ်အုပ်လိုမျိုး သိနေသလို မပြုမူပါနဲ့ကိုကို။
ကိုကို မသိတဲ့ဟာတွေလည်း ညီမလေး လောကကြီးဆီကနေ သင်ယူတတ်မြောက်ခဲ့တယ်ဆိုတာ ကိုကိုမမေ့ပါနဲ့။
ကိုကို ဂရုစိုက်တာကို မသိချင်ယောင်ဆောင်ပေမယ့် ညီမလေးတအားကျေနပ်တယ်။ အပေါင်းအသင်းတွေ ကြားထဲ ဘယ်လောက်ဂုဏ်ယူမိလဲဆိုတာ ကိုကိုမသိဘူး။
ညီမလေးက မိန်းကလေးပါ ကိုကို။ ဂရုစိုက်တာ ကြိုက်ပေမယ့် ညီမလေးက ကိုကို ညီမလေးကို ရွယ်တူတန်းတူ ဒိုးတူဘောင်ဘက် ဘော်ဒါတွေလို ဆက်ဆံစေချင်တယ်။
ပန်းလေးတပွင့်လို ညီမလေးကို ပြုစုပျိုးထောင်ပေးတာမျိုး မကြိုက်ဘူး။ ညီမလေးနဲ့ ကိုကိုက ဥယျာဉ်ထဲက အမျိုးမတူတဲ့ပန်းလေးတွေလိုမျိုး။
အတူတကွ ရှင်သန်၊ ဖူးပွင့်ကြမယ်။ အဲလိုရှင်သန်တဲ့ အခါ၊ ဖူးပွင့်တဲ့ အခါ တွေ့ကြုံရတဲ့ အကြောင်းတွေ၊ အဖြစ်အပျက်တွေ၊ ပျော်ရွှင်မှု၊ နာကျင်မှုတွေ ကိုကို့နဲ့ အပြန်အလှန်ဖလှယ်။
ညီမလေးတို့က အမျိုးမတူတဲ့ပန်းကလေးတွေမဟုတ်လား ကိုကို။ လူတွေဟာ အလုံးစုံ မရင့်ကျက်နိုင်ကြဘူး ဆိုတာ ကိုကိုမသိဘူး။
ညီမလေးက စူးစမ်းချင်တယ်။ သင်ယူချင်တယ်။ အို.. ဖြစ်နိုင်ရင် လောကကြီး တခုလုံးမှာ မသိသေးတာတွေကို သင်ယူချင်သေးတယ်။ သင်ယူမှုမှာ နာကျင်တာတွေရှိမယ်။ ညီမလေးနာကျင်မှုဟာ ကိုကို့နာကျင်မှုဖြစ်တယ်။
ဒါပေမယ့် ကိုကို့ကို နာကျင်စေချင်လို့တော့ မဟုတ်ပါဘူး။ ကိုကို့ နာကျင်မှုဟာလည်း ညီမလေးရဲ့ နာကျင်မှုဖြစ်ပြန်တယ်လေ။
ဒါပေမယ့် အဲဒါ ကိုကိုက မသိဘူး။
အဲဒါမို့ပြောတာ..
ညီမလေးချစ်တာ ကိုကိုမသိဘူး .. လို့။
..........................................
ကိုကိုချစ်တာ ညီမလေး မသိဘူး။
ကျွန်တော့ညီမလေးက ချစ်ဖို့ကောင်းတယ်ဗျ။ ငယ်ရွယ်တယ်။ လွတ်လပ်တယ်။ ပေါ့ပါးတယ်။ လန်းဆန်းတယ်။ သင်ယူချင်တယ်။ လေ့လာချင်တယ်။
ညီမလေးက သူ့ကို ဂရုစိုက်တာကြိုက်တယ်။ ဒါပေမယ့် အဲလို ကြိုက်တာကို ကျွန်တော်သိတာ သူမကြိုက်ဘူး။ ဂရုစိုက်တာ ကြိုက်မှန်းသိလို့ လုပ်ပေးတာမျိုးမကြိုက်ဘူးပေါ့ဗျာ။
အဲတော့ ကျွန်တော့်မှာ မသိမသာ ဂရုစိုက်ရတယ်။ အဲဒါဟာ ဘယ်လောက်ခက်ခဲလဲဆိုတာ ညီမလေးမသိဘူး။
ညီမလေး အပြုံးတပွင့်ရဖို့ လက်ဖက်ရည်သောက်ရင်း စက္ကူငှက်လေးတွေ မသိမသာ ခေါက်ပေးနေတဲ့ အချိန်မှာ
(ညီမလေးအကြိုက်တွေ လိုက်လုပ်ပေးနေတဲ့အချိန်မှာ) ကျွန်တော့်ရဲ့ ရှက်ရွံ့မှုတွေကို ညီမလေးမသိဘူး။
ပါးစပ်ကမပြောပေမယ့်လည်း ညီမလေးက ငှက်လေးတွေကြည့်ပြီး ကျေနပ်သွားတဲ့ အခါ အဲဒီရှက်ရွံ့မှုတွေ ချက်ချင်း အငွေ့ပြန်ပျောက်ကွယ်သွားတယ်ဆိုတာ ညီမလေးမသိဘူး။
ကျွန်တော့ ညီမလေးမှာ အိမ်မက်တွေက ခပ်များများ။ ကျွန်တော့်ကို သူ့အိမ်မက်တွေ အကြောင်းပြောရင် စကားတွေ မဆုံးတမ်းပေါ့ဗျာ။
သင်ယူချင်တာကျွန်တော်နှစ်သက်မိတယ်။ ညီမလေးက တော်တယ်။ ဥာဏ်ကောင်းတယ်။ လုပ်နိုင်တာ ကျွန်တော်သိတယ်။ ဒါပေမယ့် လောကကြီးက နတ်ဆိုးတွေ ကြီးစိုးတဲ့ရာသီမှာ ကောက်ကျစ်တတ်တယ်။ အမြဲတမ်းတော့ မဟုတ်ဘူးပေါ့ဗျာ။
ထင်သလို ဖြစ်မလာတတ်တဲ့အခါ ညီမလေးနာကျင်မှာကို စိုးတယ်။ နာလည်းနာကျင်ဖူးတယ်။ နာကျင်တဲ့ အခါ ကျွန်တော့ပခုံးပေါ် မှီလို့ ငိုလို့ပေါ့။ ပြီးရင်တော့ ခဏပဲ။ ညီမလေးမေ့သွားမယ်။
ညီမလေးက သင်ယူချင်သလောက် လောဘကြီးတယ်။ အလောတကြီးလုပ်တဲ့အခါ အမှားများတယ်။
ကျွန်တော်က တဖြည်းဖြည်းသင်ယူလေ့လာစေချင်ကြောင်းပြောရင် ညီမလေးက သူ့ကို မရင့်ကျက်ဘူးလို့ ပြောတယ်ထင်မယ်။ သူ့ကို အဲလိုဆက်ဆံရင် ညီမလေး မကြိုက်မှန်း ကျွန်တော်သိတယ်ဆိုတာ ညီမလေးမသိဘူး။
မီးကို ပူမှန်းသိလို့ ကျွန်တော့်အတွေ့အကြုံရသိလို့ပြောရင်တောင် ညီမလေးက သွားကိုင်ကြည့်ပြီးမှ ယုံချင်တယ်။ အတွေ့အကြုံတိုင်းက မှန်တယ် ကျွန်တော်မပြောပါဘူးဗျာ။
မှန်တဲ့အရာတွေကိုတောင် သိနေပေမယ့် ညီမလေးက လုပ်ကြည့်ချင်လို့ ရပ်ကြည့်နေရတဲ့ အခါ ရင်ထဲမှာ နာကျင်ရတယ်ဆိုတာ ညီမလေးမသိဘူး။
"ပူတယ်လို့ပြောနေတာကို အခုပူသွားပြီမလား" လို့ နာကျင်ခံခက်ပြောရင်တောင် "ကိုကိုက အရာရာကို သိနေပါတယ် ဆိုတဲ့ ပုံစံမျိုးလားကိုကို" လို့ ပြန်ပြောခံရရင် ညီမလေးအပူလောင်သွားသလိုမျိုး ကျွန်တော့နှလုံးသားတွေ ပူလောင်သွားတယ် ဆိုတာ ညီမလေးမသိဘူး။
တခါတလေ ဖြစ်ချင်တာဖြစ်ဟာ ဆိုပြီးစိတ်ကူးပေမယ့် အဲဒီစိတ်ကူးဟာ ဆပ်ပြာပူဖောင်းလိုပဲ ခဏပဲခံတယ် ဆိုတာ ညီမလေးမသိဘူး။
သူ့ဘေးမှာ ကျွန်တော်ရှိနေမှ ဖြစ်မယ်လေ (ရှိနေချင်တယ်)။
အဲလို စိတ်ကူးတွေနဲ့ နှစ်တွေအများကြီးရဲ့ မနက်တိုင်းကို နိုးထခဲ့တယ် ဆိုတာညီမလေးမသိဘူး။
အဲဒါမို့ပြောတာ...
ကျွန်တော်ချစ်တာ ညီမလေးမသိဘူး .. လို့။
ဂျုနီယာလွင်ဦး
No comments:
Post a Comment