ခုံတော်မောင်ဂျိုက်သိုး

(၁)
ကျွန်မတို့က ကိုကြီးဂျိုက်သိုးလို့ ခေါ်ကြတဲ့ အစ်ကိုတစ်ယောက်က ရွာလူကြီးပါ။ အဖေ့တူဆိုတော့ ကျွန်မ တို့ ဆွေမျိုးတွေထဲမှာ စားမနာ နှိုက်မနာရှိတဲ့ အိမ်ကိုး။ ကျွန်မတို့ ငယ်ငယ်ကတည်းက ရွာလယ်ဝိုင်း တိုက် ထဲက ကိုကြီးဂျိုက်သိုးတို့အိမ်ကို မရောက်ရတဲ့နေ့ မရှိဘူး။

ကျွန်မအဖေ့ နှမ၀မ်းကွဲ ဒွေးလေးသောင်းက မွေးတဲ့ မွေးချင်းတွေထဲမှာ ကိုကြီးဂျိုက်သိုးတစ် ယောက်ပဲ ရွာမှာ ကျန်တာပါ။ ကျန်တဲ့နှမတွေ ညီတွေက ချောင်းဆင်း၊ ရေပုလဲ၊ နှဲမှုတ်ရွာ၊ မြေတော်၊ မီးလောင်ကျွန်း စသဖြင့် တခြားရွာတွေမှာ အခြေကျကြပါပြီး။ ကိုကြီးဂျိုက်သိုးကတော့ မွေးက တည်းက ရွာကခွာတယ် မရှိဘူး။ ဘယ်ကိုမှလည်း မသွားလေ့ဘူး။ မသွားတော့ မရောက်ရဘူးပေါ့။
မရောက်ရလည်း ကိစ္စမရှိပေါင်ကွာ ဆိုတဲ့လူမျိုးဆိုတော့ မြို့ရယ်လို့နီးနီးနားနား မြင်းခြံကိုတောင် ရောက်ဖူးရုံ ရှိတာပါ။ မြင်းခြံမြို့ပေါ် ရောက်နေကြတဲ့ ဆွေထဲမျိုးထဲက သာမှုနာမှုလို ကိစ္စတွေမှာ လည်း များသော အားဖြင့် ကိုယ်တိုင် သွားလေ့မရှိဘူး။ သူ့မိန်းမ မဆွမ်းအုပ်ကို လွှတ်တာများတယ်။

''တော်မသွားလို့ ကောင်းပါ့မလား.. တော့်အမျိုးအရင်း ခေါက်ခေါက်ကြီးဟာကို... ရွာက ဆွေဝေး မျိုးဝေး တွေတောင် သွားကြသာ.... မသွားရင် ခွေးဖြစ်ဖို့ရှိမှာပဲ''
မဆွမ်းအုပ်က တော့်အမျိုးအရင်း ခေါက်ခေါက်ကြီးလို့သာ ပြောတာပါ။ တကယ်တော့ မြင်းခြံအလှူက မဆွမ်းအုပ် နဲ့လည်း အမျိုးမကင်းဘူး။ ကျွန်မတို့က မမအုပ်ခေါ်ကြတဲ့ မဆွမ်းအုပ်က လှီလှီကလေးရယ်။ အိမ်အလုပ်၊ အခင်းအလုပ်၊ ကျွဲနွားအလုပ်များ ဗျန်းဗျန်းကွဲ လုပ်နေရသူဆိုတော့ မဆွမ်းအုပ်က အကြောင်း ကြီးငယ် တိုင်း စိတ်ရောက်လို့ ကိုယ်အပါနိုင်ဘူး။ လင်ကို လူမှုရေးရယ် လို့ မျက်နှာပြသွားစေချင်ပေသိလို့ ကိုကြီးဂျိုက်သိုးက မလှုပ်ပေါင်။ နင်သွားနိုင်ရင်သွား၊ မသွားနိုင်လို့ မျက်နှာနာစရာရှိရင်လည်း နင်သာ နာတော့၊ ငါကဖြင့် ဒေ၀ဒဟဘက် အမှိုက်တောင် မလွင့်စေရ ဘူး။ ဆိုတဲ့မျက်နှာနဲ့ ဆေးလိပ်ကြီး ငေါ့နေတော့တာပါ။

''မိအုပ်ရယ်... နင်သွားလည်း ဖြစ်သဟာကို ငါသွားမှလား.... ငါ့မယ်အမှုတွေက တန်းလန်း.. ရပ် ရေးရွာရေး ဆိုသာ ပြောဖြစ်သာမှုတ်ဘူး... မီးရေးထင်းရေးဆိုသာ ရှိသေး.... သွားပါဟာ ကူလိုက်ပေါ့  နှစ်ထောင် လောက်''
''နှစ်ထောင် မလှပါဘူးတော်.. မမသိန်းရှင်ကမွေးတဲ့ ကလေးတွေလှူသဲ့ဟာ... ငါးထောင်တော့ ကူမှပေါ့... တော်မသွား ကျုပ်သွားပေါ့.... တော်အိမ်မှာသာနေ... မီးလောင်ငုတ်တိုမှတ်ပြီး ပျားမှမစွဲ သယ်တော် တော် နဲ့ ကျုပ် နေရာချင်း လဲလိုက်ချင်ပါ့''

ဘယ်လိုပြောပြော ကိုကြီးဂျိုက်သိုးက နာတယ်ရယ်လို့လည်း မရှိဘူး၊ နာအောင်ပြောသကော ရယ်လို့ မျက်စောင်း တစ်ချက် လှည့်မထိုးဘူး။ တစ်ခြမ်းလှိုက်စားထားတဲ့ ဆေးလိပ်ကြီးဖွာနေတော့ တာပဲ။ ကိုကြီး ဂျိုက်သိုး တို့လင်မယားက ဆေးလိပ်များတော့ ကျားကန်သောက်ကြသူတွေပါ။ မမအုပ် က စိတ်ကလေး ရှိလို့၊ အားအားယားယား ရှိလို့ကတော့ ပြောင်းဖူးဖက်လိပ် အိမ်မှာတင် လိပ်နေကျပါ။ မအားတာများ သူဆိုတော့ သူလည်း ကြုံရာသောက်၊ ကိုကြီးဂျိုက်သိုးလည်း ကြုံရာ ဖွာတော့ပဲ။

ကိုကြီးဂျိုက်သိုး တို့အိမ်က နှစ်ထပ်အိမ်ပါ။ ရေ၀င်ရွာဆိုတော့ မြှင့်ဆောက်ထားရုံမက အောက်ထပ် တစ်ထပ်လုံး မြေဖို့ထားတော့ ၀ိုင်းမြေထက်တံတောင်လောက် မြင့်တယ်။ နွားတွေက အိမ်အရှေ့ ဘက် ဆီးချဉ်ပင်ကြီး အောက် ထားတယ်။ လှည်းနဲ့နွားနဲ့ သစ်ခင်းနဲ့ဆိုတော့ ရွာအလို တောင့်တောင့် တင်းတင်း ရှိ သူတွေပါ။ အိမ်အောက်ထပ်လေးဘက်စလုံး အကာမရှိဘူး။ တိုးလျှိုပေါက် ဖွင့်ထား တော့ ကြုံသူက ကြုံတဲ့ ဘက်က ၀င်တာပဲ။ ရှေးစာပွဲ ညိုညစ်ညစ်ကြီး တစ်လုံးတန်းလျားရှည်နှစ်လုံး က ကိုကြီးဂျိုက်သိုး ရဲ့ ရုံးစားပွဲ နဲ့ ကုလားထိုင်ပဲ။ စားပွဲပေါ်မှာ ဓာတ်ဘူးဟောင်းတစ်လုံး အမြဲရှိ တယ်။ ဓာတ်ဘူက နှုတ်ခမ်းဆွေး ဖင်ဆွေး လိုက်နေပါပြီ။ ရေနွေးတော့လုံတယ်ထင်ပါရဲ့ ၊ ရေနွေး ပြတ်တယ် မရှိဘူး။ အတောင်ဖြန့်ထားတဲ့ က ဒေါင်းပုံ စဥ့်ဆေးလိပ်ခွက်ကြီးကြီး တစ်ခွက်လည်း ရှိ တယ်။ ဆေးလိပ် ဖင်စီခံ တွေ၊ ပြာတွေ နဲ့ နင့် နေတဲ့ ဆေးလိပ်ခွက် ပါ။ သွန်တယ်ပြုတယ် မရှိတော့ ပေပွလို့။

ကိုကြီးဂျိုက်သိုး က တန်းလျားပေါ် ထိုင်နေကျ။ ဘယ်တုန်းကမှ ဖင်ချထိုင်တယ်မရှိဘူး။ ကျွန်မတို့ သိတတ် တဲ့ အရွယ်လောက်ကတည်းက ဒူးနှစ်လုံးထောင်ပြီး ငုတ်တုတ် ဆေးလိပ်ထိုင်သောက်နေ တာချည်းပဲ၊ အဲသလိုများ ထိုင်နေရင် ဖွာနေတဲ့ဆေးလိပ်ထဲမှာပဲ စိတ်ရှိတယ်။ ဆေးလိပ်က မီးပွား တွေ ဖွာခနဲ ကျလို့ ပုဆိုး ထခါတာလောက်၊ ဆေးလိပ်မီးနားမညီလို့ လက်ညှိုးတံတွေးဆွတ် ပြီး ညှိလို့ လူ လှုပ်တာက လွဲရင် ငူငူကြီး ထိုင်နေတာပဲ။

ကိုကြီးဂျိုက်သိုးကို ကျွန်မတို့ကလေးတွေက အင်မတန် ချစ်ကြတယ်။ အဆိပ်မရှိ သူ ဆိုတော့ ကျောခွနေ လို့လည်း ဟဲ့ တစ်ချက်မဆိုဘူး။ ကလေးတွေ ဆော့လို့ အကြမ်းပန်းကန်ရယ်၊ ကြွေပန်းကန်ရယ် ကျကွဲ လို့ လည်း ဖြစ်ရလေဟာ မရှိဘူး။

ကျွန်မတို့က ဗျောက်သီးတွေ ခူးလာပြီး ကိုကြီးဂျိုက်သိုးတို့ နွားရေတိုက်တဲ့ အင်ဗျက်ကယ်ကြီးထဲ ထည့်ကစားကြတယ်။ ဗျောက်သီးခြောက်တွေက ရေနဲ့ထိတော့ လန့်ကွဲကြကိုး။ ဖျောက်ခနဲ ဖျောက် ခနဲ ကွဲတာကို ကျွန်မတို့ အချင်းချင်း ပြိုင်ကြတာပါ။ ဗျောက်သီးခြောက် ရှည်ရှည်ကလေး တွေကို ရေထဲ တစ်ဖက် ငါးခု စီ ချလို့ အရင်ဆုံး လန့်ကွဲတဲ့ဘက်က အနိုင်။ တစ်ခါတလေ သူနိုင်ကိုယ်နိုင် ငြင်းရင်းက အော်ကြ ဟစ်ကြရင်လည်း ကိုကြီးဂျိုက်သိုးက လှည့်မကြည့်ဘူး။ အချင်းချင်း ငြင်းခုန်ရာ က လုံး သတ် တော့လည်း ထမဆွဲဘူး။ နောက်ဆုံး အင်ဗျက်ကျယ်ကြီးကွဲတာတောင် ကျောပေးထား တာပါ။ မမအုပ် ကတော့ ကျွန်မတို့ကလေးတွေ သူ့ဝိုင်းထဲ ၀င်ဆော့တဲ့အထိ သည်းခံရှာပါတယ်။ ဗျောက်သီးတွေ ရေထဲထည့်ကစားရင်တော့ ငေါက်ကရော။

''ညည်းတို့ ဗျောက်သီးတွေကို နွားရေထဲ ထည့်မကစားကြနဲ့.... နွားရေသောက်တော့ အာထောက် တတ် တယ်... မကြံကြီးမစည်ရာတော်... ဗျောက်သီးပဲ.... ပါးစပ်ထဲ တံတွေးစိုအောင်စွတ်ပြီး လက်ဖ၀ါး ပေါ်တင်သာ နဲ့ လန့်ကွဲသာပါအေ''
ဒါမျိုး ကြားရင်တော့ ကိုကြီးဂျိုက်သိုးက သူ့မိန်းမကို ထငေါက်တော့တာပဲ။
'' ဟဲ့မိအုပ်ရာ... ဗျောက်သီးခြောက်တောင် နွားဝါးသေးသာ.. ရေနူးနေတဲ့အသီး အာထောက်ပါ့မ လား နင့် နှယ် .. ကလေးတွေကစားကြစမ်းပါစီ''
''သူတော်ကောင်းကြီးရဲ့..... နရေသောက်သဲ့ ဖျဉ်းအိုးဝယ်ရသော နှစ်လုံးရှိပြီကွဲသာ... တော့နှမ မထူး အကဲဆုံး''

''ကွဲစမ်းပါစီဟာ... အိုးဆိုသာ ကွဲမျိုးဟာကို ညည်းနှယ်... မထူးတော့ မပြောနဲ့... နင့်ညီမက ယောက်ျား မိန်းမ ရယ်... သစ်ပငါတောင်တတ်တာ.. ''
ကိုကြီးဂျိုက်သိုးက ဆွေထဲမျိုးထဲက နီးနီးဝေးဝေး ဘယ်ကလေးကိုမဆို ညည်းခံရှာတာလည်း မှန်ပါ ရဲ့ ကျွန်မ ကိုတော့ ပိုသည်းခံတယ်၊ ပိုချစ်တယ်၊ နှမ၀မ်းကွဲကလည်း ဖြစ်ပြန်၊ မိန်းကလေးကလည်း ဖြစ်ပြန် ဆိုတော့ ကျွန်မကို ပိုသည်းတယ်။ ကိုကြီးဂျိုက်သိုးက အမှုမဲ့အမှတ်မဲ့ ငူငူစူစူကြီး နေလို့ ဘာမှ မသိဘူး လို့တော့ မထင်နဲ့။ ကျွန်မအိမ်ထောင်ကျလို့ ရွာပြန်တော့ ငယ်ငယ်က ကျွန်မဆိုးတာ ကဲတာ၊ ကျွန်မ ကြောင့် ပန်းကန်ကွဲတာ အိုးကွဲတာကအစ အကုန်ပြန်ပြောနိုင်တယ်။
(၂)
အင်္ကျီချွန်ထားလို့ မည်းပြောင်နေတဲ့အညာသား ကျောကုန်းကြီးနဲ့ ဆေးလိပ်ဖွာရင်းက ကျွန်မအိမ် သားကို တစ်လုံး မကျန် ပြောနေတော့တာပါ။ ကျွန်မအိမ်သားကို ကျွန်မခေါ်သလို ဆရာပဲ ခေါ်ရှာ ပေမယ့် ဘာဆရာ မှန်း ကောင်းကောင်း သိတာမဟုတ်ဘူး။

''ရော်... ဆရာ့နှယ်... မထူးငယ်ငယ်က အင်မတန်ဆော့သာကိုး... တရုတ်မန်ကျည်းပင် ဆူးပြောက် ထိုးနေသာ ထောင်ရအောင်တက်သာ... သူခူးထားတဲ့ အသီးပြုတ်ကျလို့သူများ ကောက်ပြေးရင် မြစ်ထဲ ခုန်ချသာ တောင်မလွတ်ဘူး... လိုက်သာ... နရိုင်း(နွားရိုင်း) စီးလို့ ခါချသာများ ခရိုး(ခါးရိုး) ကျိုးကရော မှတ်သာ ဘိုးဥာဏ်အိမ်က ပိန္နဲသီးနုနုကေးလတွေ တုတ်နဲ့ ရိုက်ချလို့ ဘိုးဥာဏ်ခမျာ ငိုလိုက်သာများ''
ကိုကြီးဂျိုက်သိုးက ရွာမှာ သူစစ်ရတဲ့အမှုတွေ အကြောင်းများပြောရင် ထမင်းထမစာုးတော့ဘူး။ စာရယ်လို့ ပတ်တီးချားလည်းး ကောင်းကောင်းမတတ်ပေသိ အကြားအမြင်များလို့ ပြောနိုင်ဆိုနိုင် တော့ ရှိရှာသူပါ။ အထူး သဖြင့် မြို့က လာတဲ့လူတွေဆိုတဲ့ စိတ်နဲ့ သူလည်း ခေသူမဟုတ်တဲ့ အကြောင်း ဂိုက် ထုတ်ချင် တာက ပိုပိုပါ။

'' ဆရာ့နှယ်... ကျုပ်စစ်သဲ့အမှုတွေက ရွာမှုရပ်မှုဆိုသော်လည်းပဲ မဟော်သဓာပညာရှိ သားတရား၊ စီရင်သား တို့ထက် ဦးနှောက်ခြောက်ရသယ်... မဟော်သဓာက ဘုရားလောင်းဆိုတော့ ဥာဏ်ပါရမီ က ပါပြီးသား ဟာကိုဗျ.. ကျုပ်က ဥာဏ်ပါရမီ ဘာရှိမှာတုန်း သို့သော် ကျုပ်ခံတွင်းက နတ်စောင့် သာ .. မယုံမရှိနဲ့... တစ်ခါများ... ''
''ဘာနတ်တုန်း ကိုကြီးသိုရဲ့ ... ''
''မိဆိုင်ဖဆိုင် နတ်လည်း ပါသယ် .. ဆွေနတ်မျိုးနတ်လည်းပါတယ်''
''ဆွေနတ်မျိုးနတ်ဆိုတာက... ''

''ကျုပ်တို့အမေကြီး မဒေါင်းစိမ်းဆိုသာ ကျုပ်တို့ငယ်ငယ်ကတည်းက သေသေချင်း နတ်ဖြစ်သာ ဆရာရဲ့ ..အမေကြီးက မကျွတ်ဘူး... သူနတ်ဖြစ်နေပြီ အိပ်မက်ပေးလို့ ၀ိုင်းထဲနတ်ကွန်း ထဆောက် ပေးတာပာ တစ်ခါ တလေ နောက်ဖေး မှာ ငုတ်တုတ်ထိုင်နေသာ မြင်ရသယ်''
''ဒါကြောင့် တရား နတ်စောင့်တယ် ပြောတာနေမှာ''
''အစစ်ပေါ့''
သည်တစ်ခေါက် ရွာပြန်တော့ ကိုကြီးဂျိုက်သိုး အိုရှာပါပြီ။ တောသူတောင်သားဆိုတော့ သန်သန် မာမာ တော့ ရှိရှာတုန်းပါ။ အင်္ကျီကတော့ ၀တ်တယ်မရှိဘူး။ ခါးကုန်းကုန်းးဝမ်းဗိုက်ရှပ်ရှပ်ကြီးနဲ့ တန်းလျားခုံပေါ် ငုတ်တုတ် ထိုင်လျက်ပါပဲ။ ကိုကြီးဂျိုက်သိုးက အဖေ့တူဆိုပေ့သိ အမေ့အမျိုးလို လည်းပြောရင် ဖြစ်ပါရဲ့ ။ ကိုကြီးဂျိုက်သိုး အမေ ဒွေးလေးသောင်းနဲ့ ကျွန်မအဖေနဲ့က မောင်နှမ တော်သလို ကိုကြီးဂျိုက်သိုး အမေကြီးနဲ့ ကျွန်မအမေဘက်က အဘ(ဘိုးကံသာ) နဲ့က မောင်နှမ ၀မ်းကွဲ။ ကျွန်မတို့က နှစ်ဖက် တော့် ပေါ့။

ကိုကြီးဂျိုက်သိုးနဲ့ သူအမှုတွေအကြောင်းကလည်း ရွာမှာတော့ စီရင်ထုံးပေါ့။
''အစ်ကို မမအုပ်... ကျုပ်တော့ သေသာသေချင်တော့တာပဲ.. အိမ်ကအကြီးကောင် အောင်သန်း သိ သမှုတ်လား... တောင်ရွာဖျောက်ဆိပ်ပင်မှာ လူရိုက်ခံရလို့တဲ့... ရိုက်တဲ့ကောင်က လှဝင်းသားမက် မြမောင်သဲ့... ''
''ဘယ်လှဝင်းတုံး''
''ဖိုးတုတ်ညီ ငရှောင်နဲ့ရသဲ့ ကောင်မလေ''
''ဘယ်ဖိုးတုတ်တုံး''
''ဟော်တော် အစ်ကိုကလည်း ကိုကြက်တောတို့ လှေလိုက်တဲ့ ဖိုးတုတ်လေ''

''ဘယ်က်ြတောတုံး''
''ဇဂျူးရွာက မအုန်းစိန်ဟာကော အစ်ကိုရဲ့''
''ဇဂျူးက အုန်းစိန်.... ဘယ်သူ့အဆက်ထဲများပါလိမ့်''
''မမအုပ်သိပါတယ် မမအုပ်တို့ ကျုပ်တို့ ဇဂျူးအလှူသွားတုန်းက ကျုပ်တို့ အပြန်ပဲ နှစ်ပြည်သားစီ ပေးလိုက်သဲ့ မိန်းမဟာကော မောင်နှမနှစ်ယောက်ရှိသာ မောင်ကကြက်တော အစ်မကအုန်စိန် .. မောင်နှမချင်း မတည့်ကြဘူး။ ကြက်တော က လှေတစ်စင်းဝယ်ပြီး ညောင်တိုဘက်သွားနေသာကြာ ပြီ.. ညောင်တိုသား ဖိုးတုတ်ကို လှေပေါ်တင်သာ''
''အေးလေ... အခုက နင့်သားကို ဖိုးတုတ်က ရိုက်လွှတ်တာလား''

''ခက်ပေါ့ကော.... ဖိုးတုန်က ရိုက်သာမှုတ်ဘူး။ အစ်ကိုရဲ့ ဖိုးတုတ်ညီ ငရှောင်နဲ့ရသဲ့ လှဝင်းသား မက် မြမောင်က ရိုက်သာ''
''သြော် အေး... အရိုက်ခံရသာက အောင်သန်း''
''ကျုပ်သားလေ.... အကြီးကောင် အောင်သန်း''
''ငါသိပြီ.... ဘယ်လိုဖြစ်ကြသာတုံး... ရိုက်သာကဘယ်မှာ.... ''

''တောရွာ ဖျောက်ဆိပ်ပင်အောက်မှာ ရိုက်သာတဲ့... ချိုစောင်းမှာ ဟက်တက်ကွဲကရောတဲ့ ကျုပ်အိမ်က တက်တိုး တော့ လိုက်သွားလေရဲ့ .. နှစ်ယောက်သုံးယောက်လည်းပါသွားကြသယ်..... မိညှက်မ ယောက်ျား ဘယ်သူတဲ့ ...ငအေး... နောက်နှစ်ယောက်က တက်တိုးတူ နှစ်ယောက် မိဖုရား ရွာက လာနေကြသာ... သူတို့လည်းပါသွားကြသယ်... တုတ်တွေနဲ့ လိုက်သွားကြသာ... ရိုက်နှက် ကုန်ကြပြီ လားတောင် မသိဘူး... အစ်ကိုလိုက်ပါဦး''
''အစ်ကိုနဲ့ကျုပ် မောင်ုနှမတော်သဲ့ဟာ ကျုပ်အိမ်ဧည့်ဝင်သာ တိုင်ရဦးမှာလား... ကိုင်းပါ... အခု အစ်ကို လိုက်ခဲ့ပါ.. ကျုပ်တော့ သေချင်သာပဲ''
''မိအုပ်... နင်လိုက်သွားစမ်း''

အမှုက လိုရင်းမရောက်ဘူး။ အမှုတိုင်သူနဲ့ တိုင်ချက်မှာ လူများများပါလာလေ နဂိုအမှုက ဘေး ရောက်လေဖြစ်ရတာလည်း ကိုကြီးဂျိုက်သိုး စစ်ချက်ယူတိုင်း ဖြစ်နေကျပါ။ ကျွန်မအဖေက သူ့ တူအကြောင်း ပြောရင် မပြောခင်ကရယ်နှင့်တာပါ။ သူ့တူ ရိုးလွန်းတာ၊ စိတ်ရှည်တာ ၊ သည်းခံတာ၊ ဘယ်သူက ဘာပြောပြော ဘာတိုင်တိုင် ထောက်ခံတာ၊ မူလအမှုက နှစ်ဖက်ကျေအေးနိုင်ပါလျက် ကနဲ့ သူ့တူဝင်စစ်မှ အမှုပိုကြီးတာတွေ စကားရောက်တိုင်း ပြောတတ်တယ်။

''ငသိုးက လူကြီးသာလုပ်နေသာ အိမ်ကထချင်သဲ့ကောင် မှုတ်ဘူး... တစ်ခါတော့ ညဘက်ကြီး တို့ ရွာအရှေ့ ဇလပ်ကုန်းရွာဘက်က သေနတ်သံကြားလို့တဲ့.... အိပ်နေတဲ့ သူမယားဆွမ်းအုပ်ကို ဇလပ်ကုန်း ဘက်သွားမေးစမ်း ညဘက် သေနတ်သံကြားသာ မဟုတ်မှလွဲရော ဓါးပြတိုက်သာနေမှာ တဲ့၊ မနက်ကျ ဆွမ်းအုပ်က အဖေ့လာတိုင်သယ်... ဘကြီးသူ ဆုံးမဦးတဲ့ ကျုပ်ကို ညကြီးမှောင် မှောင် တစ်တိုင် လောက်ဝေးတဲ့ ဇလပ်ကုန်းဘက် ဇွတ်လွှတ်နေသာတဲ့ ဒါနဲ့ အဖေက သွားငေါက် တော့ ငသိုးက အေးအေးပဲ''
''အဖေ့ကို ဘာပြောလိုက်တုံး''

''ဟာ့ဘကြီးရာ.... ကျုပ်က လူကြီးဖြစ်ပြီသူများပြောမှ ကြားရသာဆိုရင် ဘယ်ကောင်းနိုင်ပါ့မတုံးဗျ၊ ဒါကြောင့် မိအုပ်ကို နှိုးလွှတ်သာ.... မိန်းမ မသွားပေါင်တဲ့ဗျာ... မင်းက ဘာဖြစ်လို့ မသွားသာတုံး ဆိုတော့.. ဟာကျုပ်လိုက်သွားတော့ သေနတ်မှန်မှာပေါ့တဲ့ဗျာ''

ကျွန်မတို့ မောင်နှမတစ်တွေက ရယ်ကြတော့ ဒါတင်ဘယ်ကလိမ့်မလဲတဲ့။ အဖေကပြောတော့ အမေ ကလည်း သတိရတာဖြည့်ပြန်ရော။ မိဘတွေ ပြောဖန်များလို့ ကျွန်မတို့ ဘယ်အချိန်သွားသွား ရွာလူကြီး ကိုကြီးဂျိုက်သိုးကို သွားတွေ့နေကျ။ မြို့ကပါလာတဲ့ မုန့်တွေဘာတွေ လက်ဆောင်ရယ် လို့သွားပေးရင် ဆွေမျိုးမို့ ပေးတယ်အောက်မေ့တာက နည်းနည်း၊ ရွာလူကြီးမို့ မျက်နှာလာလုပ် တယ်ဆိုတဲ့ပုံက များများပါ။ မမအုပ်ကတော့ မက်ရှာပါရဲ့။ ကိုကြီးဂျိုက်သိုးက မြို့မုန့်တွေရိုးနေပေါ့ ဆိုတဲ့ မျက်နှာ နဲ့ တို့ချင်မှတို့တာ။ ကျွန်မတို့က သူ့အကြောင်းသိလို့ စားပါဦး ကိုကြီးဂျိုက်သိုးရဲ့ ဆိုတော့ တစ်ဖဲ့ လောက်ယူစားပြီး နင်တို့အစ်မကျွေးပါဟာ လုပ်တော့တာလေ။ မမအုပ်က တောသူ ဆိုတော့ ဘွင်းဘွင်းပဲ။

''တော့်ဖို့ရာရယ်လို့ ဘယ်မြို့က ဘယ်အမျိုးက မုန့်တွေ ဖာနဲ့ထည့်ထမ်းလာလို့တုံး... မနှစ်က ရွာဘုန်းကြီး လာကန်တော့ကြတဲ့ ညည်းတို့မန်းလေးက ကိုသန်းဝင်းတို့ ကိတ်မုန့်ပေးသွားသာကို တစ်သက်လုံး စားရ သလိုလို လုပ်နေသာ... တော်မစား ကျုပ်စားသတော်''

ကျွန်မက စကားလမ်းကြောင်းလွှဲရတယ်။ ကိုကြီးဂျိုက်သိုးလည်း ပိန်လိုက်တာ၊ အစားမမှန် အသောက် မမှန် ဖြစ်နေပုံပေါ်ပါရဲ့ အမှုစစ်တာလည်း စစ်တာပေါ့ ဆိုတာမျိုးနဲ့ အမှုသင်းကဲများ သလိုလို စကား ထည့်ရင် ချက်ချင်းဝင်လာတာပဲ။ ဒေါင်းဆေးလိပ်ခွက်ထဲက ပြောင်းဖူးဖက်တိုက်ု ကောက်ယူပြီး မီးခတ်နဲ့ ညှိတယ်။ အောက်နှုတ်ခမ်းကြီးထော်ပြီးငေါ်ငေါ်ကြီးဖွာတော့တာပါ။
''အမှုက မရှိဘူးဆိုရင် တစ်နေ့သုံးမှုတော့ အောက်ထစ် ရှင်းရသာပေါ့ ငါ့နှမရာ... နခိုးမှု.. ငွေတိုး ကြေးတိုးမှု၊ အခင်းပေါင် အခင်းရွေ့မှု၊ သစ်ခင်းထဲနွားဝင်မှု၊ စုံလို့ပါဟာ... ဖဲဝိုင်းကြက်ဝိုင်းများ ဖမ်းရ သာရှိသေး... လင်ကွာ မယားကွာကလည်း ငါဝင်မှ.. ချေးတုန်းကပဲနဲ့ ပြန်ဆပ်သဲ့ပဲ မတူသာလည်း ငါပဲရှင်းရသယ်''

ချေးတုန်းကပဲနဲ့ ပြန်ဆပ်တဲ့ပဲ မတူတဲ့အမှုကတော့ အမှုတကာမှာ ရှားရှားပါးပါးဆိုတော့ ကျွန်မက သေချာအောင် အမှုဖြစ်ပွားပုံကအစ မေးရတယ်။ ကိုကြီးဂျိုက်သိုးက သူ့ဓာတ်ဘူးဟောင်းထဲက ရေနွေးတစ်ခွက် ကျွန်မအတွက် ငှဲ့ပေးပြီး ထန်လျက်ပန်းကန်ရှေ့တိုးပေး တော့တာပါပါ်။ မပြန်နဲ့ဦး သည်အမှုက တော်တော်ပြောရမယ့်အမှုဆိုတဲ့သဘောပါ။ ကိုကြီးဂျိုက်သိုးပြောသလောက်ဆိုရင် နှစ်ဖက်ပြဿနာဖြစ်သူတွေ၊ ကိုကြီးဂျိုက်သိုး ရုံးကိုရောက်နေကြသူတွေဟာ ကျွန်မအစ်မနှစ် ယောက်ဖြစ်တဲ့ မပေါများနဲပ အဗွေးတဲ့။ မပေါများက အဖေ့အမျိုး၊ မဗွေးက အမေ့အမျိုး။
''ခက်သဟာ... ငါက သူစိမ်းအမှုကိုင်လိုင်ချင်သေးသယ်... ဆွေမှုမျိုးမှု မကိုင်ချင်ဘူး... ပေါများက နင့်အဖေအမျိုးဆိုတော့ ငါအမျိုးကိုးဟ... မိဗွေးကလည်းနင့်အစ်မ မိအုပ်အမျိုး... အဖိုးမတန်သာနဲ့ ဖြစ်ကြသာပါဟာ... ထိပ်ပေါက်ခေါင်းကွဲ ဖြစ်ကြမလို့... ငါဝင်လို့''

''အစ်ကိုက မှန်တဲ့ဘက်လိုက်ရုံပေါ့... ကိုယ်လူကြီးပဲဟာ''
''နင်ပြောတော့ လွယ်တယ်..အမှုက နှစ်ဖက်စလုံးက မှန်သာကိုးငါ့နှမရဲ့''
''နှစ်ဖက်စလုံးမှန်မှတော့ အမှုက ဖြစ်စရာရှိပါဦးမလား အစ်ကိုရဲ့''
''လိုသာပေါ့ ငါ့နှမရ..... ဒါမျိုး သာပြီးဆုံးဖြတ်ရခက်သေး''

ဖြစ်ပုံက ကျွန်မအစ်မနှစ်ယောက် အပေးအယူ အချေးအငှားရှိကြရာက စတဲ့ ပြဿနာပါ။ ညီအစ်မ ၀မ်းကွဲ နှစ်ယောက် မြင်းခြံပွဲရုံတွေကို ပဲသွားရောင်းတော့ မော်တော်တစ်စီးတည်း အတူတူစီးကြ တယ်။ မြစ်ဆိပ်က မော်တော်ဝမ်းထဲ ပဲအိတ်တွေ ရွတ်ချတော့လည်း သူ့အိတ်ကိုယ့်အိတ် မခွဲဘူး။ တစ်ယောက်တစ်လက် ရွက်တင်ကြတဲ့အထိလည်းအကောင်း၊ မြင်းခြံမြစ်ဆိပ်က ပွဲရုံအထိလှည်း ငှားသွားတော့လည်း အတူတူပါပဲ။ ပွဲရုံက ပဲခြင်းကျတော့ မပေါများ ယူလာတဲ့ပဲက တစ်တောင်း ပြည့်ဖို့ နည်းနည်းလိုတော့ မဗွေးပဲထဲက နှစ်လက်ခုပ်သုံးလက်ခုပ် ယူဖြည့်တယ်။

ယူဖြည့်လိုက် တုန်းက နှစ်လက်ခုပ် သုံးလက်ခုပ်ရယ်လို့ ဖြည့်လိုက်တာပဲ။ ပဲထဲစိတ်ရောက်နေကြတော့ တစ် ပြည်ရယ် နှစ်ပြည်ရယ်မတွက်ခဲ့ကြဘူး။ ရွာပြန်ရောက်တော့ မဗွေးက ပဲကြွေးတောင်းရော တောင်း တော့ မပေါများက ပဲကို လက်ခုပ်နဲ့ မှန်းပြီးချင်တယ်။ သွားဆပ်တယ်။ သည်တော့ မဗွေးက သူ့ဆီ က ယူလိုက်တာ သည်လောက်မကဘူး ဖြစ်ကရော။ ဒါတင်မကဘူး။ မဗွေးက သူ့ဆီက ပဲလုံးစင်လုံး သန့်ချေပြီး ပြန်ဆပ်တော့ ကောက်သင်းကောက်ပဲ ပဲဖျင်းပဲညံ့ ဆပ်တယ်လုပ်ပြန်တယ်။ မပေါများက ငါဆပ်သလောက် မကဘူးဆိုရင် ဘယ်လောက်လဲ ပြောပါဆိုတော့လည်း မဗွေးက မပြောနိုင်ဘူး။ ညည်းပဲက ဘာတွေကောင်းလို့ ငါ့ပဲက ဘာတွေညံ့တာလဲ ပြောပါဆိုတော့လည်း မဗွေးက မပြောနိုင်ဘူး။

သည်မှာတင် ညီအစ်မ ဝမ်းကွဲနှစ်ယောက် ငြင်းကြခုန်ကြရာက နပမ်းထလုံး လိုက်တာ ဘယ်သူမှ ဖျင်လို့ မရဘူးတဲ့။ နောက်တော့ လူကြီးတွေဖျင်လို့ လူချင်းကွဲတာတောင် တစ်ယောက်တစ်ယောက် ငယ်ကျိုး ငယ်နာ တွေပြောပြီး စောင်ကြသတဲ့။ ကိုကြီးဂျိုက်သိုးဆီရောက်တော့ ပြေလည်အောင် ဖြေရှင်း ပေးလိုက်ရတယ်လို့ ဆိုတယ်။
'' အစ်ကိုက ဘယ်လိုဖြေရှင်းပေးလိုက်တာလဲ။''

''လွယ်ပါ့ဟာ-----မိဗွေးကို ပေါများ ဆပ်သဲ့ပဲထုပ်က ငါ့အိမ်ပါလာသာကိုးဟ--- အဲသာကို ငါယူထားလိုက်သယ်----- ငါ့ကိုထားလိုက်သယ်---ငါ့အခင်းကထွက်သဲ့ ပဲစင်စင်သား ပေါများ နင်ကြိုက် သလောက် ချင်ယူသွားလို့ ပြောလိုက်သယ်--- ပေါများက နှစ်ပြည်သား ချင်ယူသွားသယ် လေ။ နှစ်ဦးနှစ်ဝ ကျေနပ်သွားကြပါ့ဗျာ။

ကိုကြီးဂျိုက်သိုးက သူရှင်းလိုက်တာကို ဂုဏ်ယူပြောနေသခိုက် ကျွန်မအစ်မ မမအုပ်က သူ့ယောင်္ကျားကို မျက်စောင်းလှမ်းထိုးလေရဲ့။ ရေနွေးလာဖြည့်ရင်းက ကျွန်မကုိုမကျေမချမ်း ပြောနေသေးတာ။
''ညည်းအစ်ကို ခုံတော်မောင်ဂျိုက်သိုး... ဒါမျိုးခဏခဏ လုပ်ရလို့ အိမ်ကပါလှပေါ့အေ... အမှုစစ်ခ တစ်မူးတစ်ပဲ မရသာထား... အိမ်ကပါသွားတာ နွားတစ်ကောင်ဖိုး မကတော့ဘူး... သည်တစ်ခါ အဲသလို အမှုတွေလာရင် ကျုပ်အိမ်ပေါ်ကအဆင်းပဲလို့ ကြိမ်ထားသယ်''
ကိုကြီးဂျိုက်သိုးက သူ့ပြောတယ် မအောက်မေ့ပါဘူး။ သူ့ကို ခုံတော်မောင်ဂျိုက်သိုး ခေါ်လို့ ကျေနပ် နေသေးတာပါ။ ကျွန်မလည်း လင်မယားနှစ်ယောက်ရှေ့မရယ်ဝံ့ဘူး။
(၃)

ကျွန်မ ရွာရောက်ရင် တည်းနေကျ ကြီးတော်တို့အိမ်ရောက်တော့ ကျွန်မကြားခဲ့တာ ပြောပြဖြစ် တယ်။ ကြီးတော်က ရယ်တော့တာပါ။ ညည်းအစ်ကိုက လူကြီးလုပ်ချင်သာရှိသာပါ။ ရပ်ရွာကို ညှာ ရှာ သူပါအေ တဲ့။ စကားက ရောက်နေပြီဆိုတော့ ကျွန်မအစ်မတွေရော၊ ညီမတွေရော၊ ကျွန်မတို့ ရွာ ရောက်နေလို့ မျက်နှာပြလာကြတဲ့ ရွာခံတွေရောက ကိုကြီးဂျိုက်သိုးအကြောင်း တစ်ယောက်တစ် ပေါက် ပြောလိုက် ကြတာများ၊ ကွယ်ရာမှာ မကောင်းပြောနေကြတာပေမယ့် ချစ်လို့ပြောနေကြတာ မှန်း ကျွန်မ သိပါရဲ့။

တစ်ခါက ဆိတ်ပြဿနာ ပေါ်ဖူးသတဲ့။ ကျွန်မတို့ရွာက ကိုဖိုးတိုးနဲ့ ကိုပေါက်တို့ နှစ်ယောက်အရှေ့ ကြည်းတောသိမ် ရွာအလှူကို သွားကြတာက စတာပါ။ ကိုဖိုးတိုးက လက်လှော်လှေကလေး နဲ့ မြစ် ထဲ ငါးရှာတဲ့ သူပါ။ ကိုပေါက်က တောင်သူ။ မနက်ခင်း အလှူမီအောင် စောစောထသွားပြီး နာရီပြန် တစ်ချက်လောက် နေပူခေါင်ခေါင်ကြီး ပြန်လာခဲ့ကြသတဲ့။

ကျွန်မတို့ရွာနဲ့ ကြည်းတောရွာတွေက နည်းနည်းလှမ်းတော့ သစ်ရိပ်ခိုလိုက်၊ နေပူပြန်တော့ ဆိတ် စာကိုင်းတစ်ကိုင်းစီချိုးပြီး ခေါင်းဆောင်းလာလိုက်နဲ့ ပြန်ခဲ့ကြတာပါ။ လမ်းမှာ ဆိတ်တစ်ကောင်နဲ့ တွေ့ကြတယ်။ ဆိတ်က တစ်ကောင်တည်း၊ ဆိတ်အုပ်ထဲက ကျန်ခဲ့တာလား၊ အနားရွာက ဆိတ် လား တော့ မပြောတတ်ဘူး။ ဆိတ်က သူတို့နှစ်ယောက်နောက် တကောက်ကောက်လိုက်လာပါ ရော၊ သူငယ်ချင်း နှစ်ယောက် စကားတပြောပြောနဲ့ လာလိုက်ကြတာ ရွာခြေဝင်တော့ ဆိတ်က ပါ လာတုန်းပဲ။ သည်တော့ နှစ်ယောက်သား ခေါင်းဆောင်းလာတဲ့ ဆိတ်စာကိုင်းပြပြီး ဆိတ်ကို ရွာထဲ ခေါ်လာကြတယ်။

''ဖိုးတိုး တို့ က ခိုးလာသာလည်း မဟုတ်ဘူး... ရွာခြေအထိ တကောက်ကောက်လိုက်လာလို့သာ ပါ လာတာကိုး... ဆိတ်ကို မောင်းထုတ်လို့လည်းမဖြစ်တော့ ဖိုးတိုးအိမ်မှာ ကြိုးချည်ထားသယ်... ဆိတ်က သူစိမ်း အိမ်ရောက်နေမှန်းသိတော့ တပဲပဲအော်လိုက်သာ နားမခံသာဘူး... ဒါနဲ့ ငပေါက် အိမ်တစ်လှည့် ပို့လိုက်သယ်... ငပေါက်မယား မိတင်ပုက လက်မခံဘူး... ကျုပ်တို့အိမ်ထားရင် ကျုပ်တို့ ဆိတ်ပဲ ဖြစ်ကရော.. သည်တော့ ဖိုးတိုးမယား သန်းကြည်က ကိုယ့်အိမ်ထားလို့ ကိုယ်ယူ ကြေးဆိုရင် ငါယူသအေ ပေါ့''

သည်မှာတင် ဆိတ်တစ်ကောင် အဝေမတည့်ကြရာက မိန်းမချင်းရန်ဖြစ်ကြတယ်။ မတင်ပု က အာ ကျယ်၊ မသန်းကြည် ကလည်း ခုနစ်တိုင်ကြား၊ ရွာထဲနှစ်ဆက်ဆဲကြ ဆိုကြဆိုတော့ အမှုက ကိုကြီး ဂျိုက်သိုး ဆီ ရောက်လာတယ်။ ကိုကြီးဂျိုက်သိုးအိမ် ဆ်ိတ်ကြီးဆွဲလာတော့လည်း ဆိတ်ကြီးက အော် တုန်း။ ဆိတ်က ခိုး လာတာလည်း မဟုတ်တော့ အပြစ်တင်ဖို့ရာလည်း ခက်တယ်။ ဆိတ်ရောင်းပြီး ပိုက်ဆံ ခွဲ ယူကြပါလား ဆိုတော့လည်း ဘာမှန်းမသိတဲ့ဆိတ်ဆိုတော့ ဝယ်မယ့်သူကမရှိဘူး။ သည် တော့ ပြဿနာပြီးအောင် ကိုကြီးဂျိုက်သိုး က သူ့အိမ်မှာမွေးထားမယ်၊ နောက်မှ စာရင်းရှင်းတာပေါ့ ဆိုပြီး အိမ်တိုင် မှာ ချည်ထား လိုက်တယ်။ ကိုဖိုးတိုးလင်မယားရော၊ ကိုပေါက်လင်မယားရော ကျေ နပ်ကြပါတယ်။ ကြားက လူကြီး အပ်ထားရင် ပြီးတာပဲပေါ့။

''အဲသည်ဆိတ်က ဂျိုက်သိုးအိမ်မှာ နှစ်လကြာသယ်.. အော်လိုက်သာလည်း ရွာက မအိပ်ရဘူး... ဂျိုက်သိုး မယား ညည်းယောင်းမ မိဆွမ်းအုပ်က နေ့တိုင်း သစ်ကိုင်းချိုင်ပြီး ဆိတ်စာကျွေးရသာ မသက်သာ ပေါင်အေ... ဆိတ်ကလည်း စားလိုက်သာ စက်နဲ့ကြိတ်သာကျလို့''
''နောက်တော့ ဘယ်လိုပြီးသွားတုန်း ကြီးတော်ရဲ့''

''ပိုင်ရှင်ပေါ်လာသာပေါ့အေ... သိမ်ရွာက ပိုင်ရှင်လိုက်လာတော့ ဟုတ်နေသာကိုး... ချည်တိုင်က ဖြုတ်ပေးလိုက်ရသာလေ... ဆိတ်က ပိုင်ရှင်တွေ့တော့ ငေါက်ခနဲထလိုက်သာ.. မိဆွမ်းအုပ်က ဆိတ်စာ နှစ်လ ကျွေးထားရသာကော ဆိုတော့ ဆိတ်နို့နှစ်ပုလင်းပေးသွားတယ်... သူ့ခမျာလည်း အဖက်မွေးသဲ့ ဆိတ်မို့ပါတဲ့... ဆိတ်ရှင်က အလျော်တောင်းနေတုန်း သတင်းကြားနဲ့လိုက်လာသာပါ ဆိုတော့ ဘာရ မှာတုံး''
''ဖြစ်ရလေ... ''
''မဖြစ်နဲ့... ညည်းအစ်ကို ကြက်ပြဿနာတက်သာ ရှိသေးတယ်''
(၄)

တစ်ရက်တော့ ရွာတောင်ဖျားက ကိုညိုအေး ကြက်တစ်ကောင်ပိုက်ပြီး ကိုကြီးဂျိုက်သိုးဝိုင်းထဲ ဝင် လာတော့ ကိုကြီးဂျိုက်သိုးတောင် အိပ်ရာက မနိုးသေးဘူး။ မမအုပ်ကတော့ ဝိုင်ထဲတံမြက်လှည်းပြီး ပြီ။ ဆွမ်း ကပ်ပြီးပြီ။ နွားစာကျွေး နွားရေတိုက်ပြီးပြီ။ ကိုကြီးဂျိုက်သိုး နိုးရင်စားဖို့ ထမင်းကြမ်းကို ဒယ်အိုး ဆီပွတ်ပြီး အိုးကင်းပူတိုက်ပြီးပြီ၊ တစ်အောင့် တစ်ဖြုတ်နားပြီး တောထဲ(စိုက်ခင်းထဲ)သွားဖို့ ရှိတော့တာပါ။ ကြက်သမားကိုညိုအေး ရောက်လာတော့ လင်ကိုနှိုးရပြီ။ ကိုကြီးဂျိုက်သိုးက မျက်နှာ ကပျာကယာသစ်ပြီး အင်္ကျီ ချွတ်ကြီးနဲ့ တန်းလျားပေါ်မှာ ငုတ်တုတ်ထိုင်တယ်။
''ဘာတုန်းကွ ညိုအေးရ... မင်းကြက် သွေးတွေနဲ့လားလို့''

''သွေးတွေနဲ့ပေါ့ဗျ... ခင်ဗျားတူ မောင်မှတ် လက်ချက်ပေါ့... သူ့နံနံခင်း ကျုပ်ကြက်ယက်လို့သဲ့ ထင်းချောင်း နဲ့ ကောက်ပစ်လိုက်သာ ခြေကျိုးကရော... သည်မှာ ခေါင်းလည်း ကျေသွားထင်ပါရဲ့''
''ဟာ ငမှတ်... တိရစ္ဆာန်နဲ့တုမိုက်သဲ့ကောင်... မိအုပ် ငမှတ် ပြေးခေါ်စမ်း''

''ကျုပ် အခင်းထဲသွားရဦးမှာ.. လူက နောက်မှခေါ်ပါတော်... အကျိုးအကြောင်း အရင်မေးစမ်းပါဦး.. ကတည်း''
မမအုပ် က လူခေါ်တွေပါလာတော့မှာ သိတော့ တဘက်ဟောင်းခေါင်းပေါ်တင်ပြီး အခင်းဘက် ထ သွားတော့ တာပါ။ ကိုကြီးဂျိုက်သိုးက စားပွဲပေါ်တင်ထားတဲ့ ထမင်းကြမ်းအိုးခင်းပူတိုက်ကို စိတ်မ ဝင် စားဘူး။ ကိုညိုအေး ကြက်ကိစ္စ စိတ်ဝင်စားတာပါ။ ညိုအေး ပြောစမ်း... တဲ့။ မောင်မှတ်က ကိုယ့်တူ ဆိုပေမယ့် တရားဥပဒေအတိုင်း ဖြစ်စေရမယ်ဆိုတာလည်း ပါရဲ့။
''ကြက်ရာဇဝင် ပြောစမ်းကွာ ညိုအေး... သည်ကြက် မင်းကြက်လား''

''ကျုပ်ကြက်ပေါ့ဗျာ အကျိုးပေးလိုက်သာမှ ပွဲတိုင်းအောင် ကြက်ဗျ... ကျုပ်ကြက်ကို ထင်းချောင်းနဲ့ ပစ်လွှတ် လိုက်တာ ကျုပ်က ကျေနပ်မှတ်လို့... မောင်မှတ် ဝင်ရိုက်မလို့ဘဲ... ဒါပေသိ စိတ်ကိုမနည်း လျှော့ပြီး ခင်ဗျား လာတိုင်သာပဲ... ကျုပ်ကြက်အလျော်လိုချင်သယ် ဒါပဲ''
''အေးပေါ့ကွ... တိုက်ကြက် ခြေထောက်ကျိုးမှတော့ ရီးဖြစ်ကရောပေါ့... နေပါဦး... မင်းကြက်တိုက် သာ ဘယ်ရွာ သွားတိုက်တာတုံး... ရွာထဲ ကြက်တိုက်သာ လက်မခံဘူးနော်''
''ချောင်းတစ်ဖက် သွားတိုက်သာပါဗျာ... ရွာနဲ့အလွတ်ကြီးပါ... ခင်ဗျား အပိုင်ထဲ မဟုတ်ပါဘူး''

ခင်ဗျားအပိုင်ထဲ မဟုတ်ပါဘူးဆိုတာကို ကိုကြီးဂျိုက်သိုးက သိပ်သဘောကျတယ်။ ရပ်ရွာကို သူ ထိန်းထား နိုင်တယ် ဆိုတဲ့ သဘောပါတာကိုး။ ပါးတွေ နှုတ်ခမ်းတွေ တွန့်သွားအောင် ကျေနပ်နေ တာပါ။ မျက်နှာပိုးသပ်လို့မရတော့ ဒေါင်းဆေးလိပ်ခွက်ထဲက ပြောင်းဖူးဖက် လှမ်းယူမီးညှိတယ်။ ကိုညိုအေးကို မျက်လုံး လှန်ကြည့်တယ်။ ဆက်ပြောစမ်းပေါ့။
''ကျုပ်ကြက် က အရောင်က ဥပန်း... ဖောင်းဘက်လုသာဆိုတော့ ရှားသယ်ဗျ... အမြီးကျတော့ မဂို စပ်ပုံ ရသယ်... တချို့ကလည်း သတ္တိကျ ရစ်ဘက်လုသတဲ့''
''ကြက်ကောင်း ကွ... ဒဏ်ရာတွေနဲ့တောင်ထောင်နေသာကြည့်ပါလား''

''ခင်ဗျားသိမှာပေါ့ ကန်တော်က သံချောင်း... သူ့အဘ ဘိုးသိန်းဆိုသာ ကြက်ဝိဇ္ဇာကြီး... ဘိုးသိန်း က လှည်းသမား ငထွန်း နဲ့ တစ်ရက် ကျုပ်ယောက်ဖ ကျောက်ဒိုးနဲ့ ထလိုက်သွားသာ... ဟိုကျတော့ ကြည်ရွာသား ငအေးနဲ့ တွေ့ကရော.. ဘိုးသိန်းက ကျုပ်တို့နှစ်ယောက်စလုံး ကြက်ကောင်းကြိုက် မှန်းသိ လို့ တေ့ ပေးသာကိုးဗျ... ဒါမှ သူက ဈေးကောင်းရမှာကိုး''
''မလုပ်ကောင်းသာကွာ... ''

''ငအေးက ရှစ်သောင်းဗျာတဲ့... ကျုပ်က တစ်သိန်းဗျာလို့ ချလိုက်ရော... ရှုံးရင် ရွာပါသိက္ခာကျမှာ ကိုးဗျ... ''
''ငါပါ သိက္ခာကျသာပေါ့ ညိုအေးရ... မင်းလုပ်သာ သဘောကျသကွာ''
''အစစ်ပေါ့ဗျာ... ကြက်ဖိုးကို သူတိုးကိုယ်တိုးနဲ့ တစ်သိန်းသုံးသောင်းခွဲနဲ့ ကျုပ်ရလာသာ... ဟုတ်သ ဗျို့... ကြက် က သံခြေထောက်ပါသာကျလို့... ကျုပ်ဖြင့် ပွဲတိုင်းနိုင်သာပဲ''
''မင်းစောစောက ပြောသဲ့ကောင်တွေပါ ခေါ်ရမယ်... လူဝါးဝလို့ကွာ''

''မဆိုင်ဘူးလေဗျာ... အဲသာ ကျုပ်ကြက်ဝယ်တုန်းက ကိစ္စဗျ... အခု ထင်းချောင်းနဲ့ပစ်လိုက်သာက ခင်ဗျားတူ ငမှတ်က ပစ်လိုက်သာ''
''ကိုင်း ငါ သဘောပေါက်ပြီ... မင်းပြန်ဦး... ငါ ငမှတ် ခေါ်စစ်မယ်... မင်းကြက်ဘိုးက သုံးသောင်းခွဲ ဟုတ်လား''
''ဟာ... လုပ်ပြန်ပြီ... တစ်သိန်းသုံးသောင်းခွဲဗျ... လျော်ချင်လျော် မလျော်ရင် ကျုပ်က ကျူပင်ခုတ် ကျူငုတ်မကျန်ပဲ''
''မှန်သာဖြစ်ရမှာပေါ့ကွ... မင်းမှန်သယ် ညိုအေး... ကိုင်းပြန်ချေတော့''

ကျူပင်ခုတ် ကျူငုတ်မကျန်ထဲမှာ သူပါ ပါနေတာကို သဘောမပေါက်ဘူး၊ အေးပေါ့ကွ... လုပ်ရမှာ ပေါ့တဲ့။ ဒါနဲ့ ကိုညိုအေးပြန်တော့ သူ့တူ ငမှတ်ကို ခေါ်စစ်တယ်။ ငမှတ်က သူ့ခေါ်မယ်ဆိုတာသိ တော့ မြေကြီးနဲ့ရောနေတဲ့ နံနံပင်အကျိုးအကြေတွေ ဆန်ကောထဲထည့်လာတယ်။ သက်သေခံ ပစ္စည်းပေါ့။ ကိုကြီးဂျိုက်သိုးက နံနံပင်ကျိုးတွေကို လက်နဲ့ဖြဲကြည့်တယ်။
''လူပါးဝလို့ ဘကြီးရာ... သူက လူမိုင်လိုလို ဘာလိုလိုနဲ့ ကျုပ်ကိုကြိမ်းသေးသာ... ကျုပ်က ဘကြီး သွေးပဲဗျ ဘာကြောက်လိမ့်မတုံး... စိတ်ထဲဖျင်းခနဲဖြစ်လာရင် ရိုက်လွှတ်လိုက်ရမှ... ''
''ဒါပေါ့ကွ... တို့အမျိုးက သွေးသောက်ကြီးလေးယောက်က ဆင်းလာသာ... အာဂမှတ်လို့''

''သူ့ကြက်က တစ်ရက်လည်းမဟုတ် နှစ်ရက်လည်းမဟုတ်... ကျုပ်ကြဲထားသဲ့ အခင်းထဲဝင်ဝင်ပြီး သစ်ပင် တွေ ယက်ယက်ပစ်သာဗျ... ကျုပ် သည်းခံသာ သုံးခါရှိပြီ''
''သုံးခါဆိုရင် မင်းမှန်သယ်... ငါဆိုရင် နှစ်ခါနဲ့ လုပ်ပစ်မိမှာ... အခုက ညိုအေးက မင်းကို အလျော် တောင်းချင်ပုံ ရသယ်... သူ့စကား ကောက်ရတာလေ''
''မလျော်နိုင်ပါဘူးဗျာ... သူ့ကြက်ကလည်း ကျူးသေးအခင်းလည်း ပျက်သေး''
''မလျော်နဲ့... မင်းမှန်သယ်... ငါ့တူ သွားတော့ ငါရှင်းမယ်''

ကျွန်မက သည်တိုက်ကြက်ကိစ္စ ဘယ်လိုရှင်းကြတုန်းဆိုတော့မှ ပြဿနာပြီးရပုံကို ပြောပြကြ တယ်။ ကိုကြီးဂျိုက်သိုးက နှစ်ဖက်စလုံးမှန်တယ်ချည်း လုပ်နေတော့ နှစ်ဖက်စလုံးက အမှုနိုင်မယ် တွက် ထားကြတာပါ။ ကိုညိုအေးရှေ့ကျတော့ လျော်စေတဲ့၊ ငမှတ်ရှေ့ကျတော့ ယောင်လို့တောင် မလျော်နဲ့တဲ့။ ဆုံရှင်းကြတဲ့နေ့ကျတော့ ကိုညိုအေးအမျိုးတွေနဲ့ ငမှတ်အမျိုးတွေ ဝိုင်းတိုက်ထဲ ပြည့် လို့တဲ့။
''လူတွေ များလာတော့ ညည်းအစ်ကို ချွေးတွေပြန်လို့ပါအေ... နောက်တော့ ကြက်က ကျုးတဲ့ အတွက် ကြက်ရှင် က ကြက်ဖိုးအပြည့်မယူနဲ့... ငမှတ်ကလည်း နံနံခင်းပျက်စီးသာဆိုတော့ ကြားချပြီး ကြက်ဘိုး တစ်ဝက်လျော် စေပေါ့အေ... ငမှတ် က မလျော်နိုင်ဘူး။ ပိုက်ဆံမရှိဘူးနဲ့ဆိုတော့ ညည်း အစ်ကို က ကိုင်းသဟာဖြင့်ရင် ငါ ပိုက်ဆံထုတ်ချေးမကွာဆိုပြီး ငွေငါးသောင်းနဲ့ ဖြတ်လိုက်ကရော.''
''ကိုညိုအေး က ကျေနပ်သလား''

"သူကလည်း နဂိုကတည်းက ကြက်ဖိုး ပိုပြောထားသာဆိုတော့ ကျေနပ်သာပေါ့.... ကြက်ကျိုး ကိုမောင်မှတ် က ယူရလိုက်ရသယ်....ညည်းအစ်ကိုက ကြားကနေ အတိုးမပါဘဲ ငွေချေးရတာ ထား... ဖြစ်ချင်တော့...."
"ပြောပါဦး...."
"မောင်မှတ်က်ထဲရောက်မှ ကြက်ကျိုးက ခြေပြန်ကောင်းပြီး ပိုတောင်မာသွားသာကိုး....ဟော သည်နားက ရွာတွေမှာ ရှိသမျှတိုက်ကြက်တွေ မောင်မှတ်ကြက်နဲ့တွေ့ရင် ရှုံးသာချည်းပဲ....မောင် မှတ်ကလည်း ရလိုက်သဲ့ လောင်းကြေး....ဂျိုက်သိုးပိုက်ဆံတော့ မနည်းပြန်တောင်းရသယ်.... ဆွမ်းအုပ်က ရန်တွေ့ တောင်းလို့သာ လေ"
"ဟောတော်..."

"မပြီးသေးဘူး....သည်ကြက်ကျိုး က ခွပ်လက်ကောင်းမှန်း သိတော့ ညိုအေးက သူ့ကြက် ပြန်လို ချင်ပါတယ် ဖြစ်ပြန်ရော... မောင်မှတ်က ဘယ်ပေးမှာတုန်း... သူကလျော်ပြီး သားဟာကိုး"
"ဟုတ်တယ်လေ..."
"နှစ်ဖက်ပြဿနာဖြစ်တော့ ဂျိုက်သိုးဆီ ပြန်ရောက်ကြပြန်ရော.... ဂျိုက်သိုးက ညိုအေး မင်းကြက် မင်း ပြန်ရစေ့မယ်တဲ့... မင်းက ဥစ္စာရင်းတဲ့... သူ့တူမောင်မှတ် ကျတော့ မပေးနဲ့တဲ့.... မင်းက ဥစ္စာပွားတဲ့"

ကျွန်မလည်း ရင်မောလာလို့ ဆက်မမေးဖြစ်တော့ ပါဘူး၊ ဘယ်ပြီးဆုံးသွားကြ တယ်မသိရပေမယ့် ရှိပါစေတော့လို့ပဲ သဘောထား လိုက်ရတော့တယ်။ စိတ်ကောင်းရှိပေမယ့် ရိုးလွန်း အလွန်းတဲ့ အစ်ကို့ကို ကျွန်မ သနားမိတယ်။ မမအုပ် က ပိုတောင် သနားစရာကောင်းသေး။ အိမ်မှာ ဘာမှ မလုပ်တဲ့ လင်ကို တန်းလျားပေါ် ငုတ်တုတ်ထိုင်ခိုင်းပြီး သူကချည်း လုပ်ကျွေးနေရတာမဟုတ်လား။ အမှုတကာ ထဲ အိမ်က ပဲမနေရ၊ နှမ်းမနေရ၊ ငွေမနေရ စိုက်ထည့်ပေးနေ ရတာက ပိုသေးကိုး။
(၅)

ကိုးကြီးဂျိုက်သိုး အကြောင်းက ရေးရင်မကုန်နိုင်ပါဘူး။ ကျွန်မရွာမရောက်တာ သုံလေးနှစ်ရှိပါပြီ။ သည်နှစ်ထဲ ဂျဒိုင်း လေးရွာဘက် စာပေဟောပြောပွဲ ရောက်ရလို့ရွာဘက် ခဏကူးခဲ့တယ်။ ညဘက် ဟော ပြောရဦးမှာ ဆိုတော့ရောက်ပြန်ပါပဲ။ ကျွန်မကကြီးတော်ကြီးနဲ့ ကိုကြီးဂျိုက်သိုး တို့အိမ် ၀င်ပြီး ငွေ ကန်တော့ ခဲ့တယ်။
ကိုကြီးဂျိုက်သိုးက ခါးကိုင်းရှာပြီ။ လေးကိုင်းကွေး ကျောကုန်းကြီးနဲ့ အင်္ကျီမပါဘဲ တန်းလျားပေါ် ငုတ်တုတ်ထိုင်လျက်က ဆုတွေပေးနေရှာရဲ့။ ရပ်ရွာ အုပ်ချုပ်ရေးကလည်း ပြောင်းလေတော့ ရွာလူ ကြီး လည်း မဟုတ်ရှာတော့ပါဘူး။ မမဆွမ်းအုပ်ကတော့ ၀မ်းသာရှာသတဲ့။ သူ့ယောက်ျား အေးအေး လူလူ နေစေချင်ရှာသတဲ့။ မမအုပ်ကလည်း အခင်းထဲမဆင်းတော့ ပါဘူး။ သူရင်းငှား နဲ့  ထားတာ ကြာပြီတဲ့။ ဟုတ်ရှာကြမှာပေါ့။ အသက်တွေမှ မငယ်ကြတော့ဘဲ။

"ငါကတော့ လူကြီးကြေးကလေးနဲ့ နေရသာပေါ့ဟာ...လာကြပါသယ်.... ဆွေထဲမျိုးထဲက ရှင်းမရ သာ ငါရှင်းပေးနေရသာပဲ... မထူး ရဲ့ နင်တို့ဘေးကြီးက တလုပ်ကိုးမြို့ဝန် ခုံမင်းကြီး ဦးရွှေလုံး ဆို သာ မင်းတုန်းမင်း ခေတ်က ဒင်္ဂမော်ပေါ့ဟာ... သူ့သွေးက ငါ့ကျမှ လာပါသာငါ့နှမရဲ့"

လူကြီးကြေးဆိုတာက သက်ကြီးဝါကြီးမို့ ဆွေတွေမျိုးတွေက လက်ရောက်ကန်တော့တာ စားနေရ တယ်ဆိုတဲ့သဘော ဖြစ်နိုင်သလို ရှင်းရတဲ့ ပြဿနာရှိရင် အမှုရှင်းကြေးရတုန်းပဲ ဆိုတာလည်း ဖြစ်နိုင်တာပါပဲ။ မမဆွမ်းအုပ်က ကျွန်မလက်တွေကို ဆုပ်ရင်း ညည်းအမေ ကြီးတော်မြတင် ကို ပြော လိုက်ပါအေ.... ကြီးတော်တူ ခုံတော်မောင်ဂျိုက်သိုး တော့ နားရှာပါပြီလို့တော့ ကိုကြီးဂျိုက်သိုး က သူ့မယား ကို မျက်စောင်းထိုးသေးတာပါ။

"မနားပေါင်ဗျာ...ကနေ့တောင် ခွေးကိုက်မှုလာကြဦးမတဲ့...တရားဆိုသာ မစောင်းရဘူး ငါ့နှမရဲ့"
ကျွန်မ ပြန်မယ်ဆိုတော့ ရွာလယ်လမ်းမပေါ်က စောင့်နေတဲ့ လှည်းအထိ လိုက်ပို့ရှာတယ်။ မျက်ရည် တွေဝဲလို့....။

ခင်ခင်ထူး