“မလွမ်းစကောင်း လွမ်းစကောင်း “

(ရှေးရှေးက မန္တလေးအပိုင်း ၂ )

“ငွေနှင်းမူံရီထုံဝေစီမြောက်လေဆော်သွေး အေးတဲ့လရာသီ သမယခါဆီ “ ဆိုတဲ့သီချင်းစာသားလေးအတိုင်းဝါလကင်းလွတ်သီတင်းကျွတ်လို့ ဆောင်းဥတုစပြီဆိုတာနဲ့မန္တလေးမြို့အနှံ့မှာ ရှိတဲ့ရပ်ကွက်အားလုံးဘုရားပွဲတွေ ကျင်းပကြဘို့ပြင်ဆင်ကြတဲ့အချိန်ပါဘဲ။သီတင်းကျွတ်ပြီဆိုတာနဲ့ “ဘုရားပွဲအစ လမ်းလယ်က အဆုံး ရတနာမဉ္ဖူ” ဆိုတဲ့စာသားအတိုင်းဘုရားပွဲတွေကို သူရက်နဲ့သူ အစဉ်အလိုက်အတိုင်းနှစ်စဉ်ကျင်းပကြပါတယ်။

စက်တင်ဘာလလယ်ရောက်ပြီဆိုတာနဲ့ မန္တလေးမြို့ 82လမ်း( 29-30)လမ်းကြားမှာ ရှိတဲ့ ဘုရားသုံးဆူဘုရားရှေ့မှာ အိုးပုတ်သယ်လေးတွေစရောက်လာပါတော့တယ်။ ဒီအသယ်လေးတွေတွေ့ပြီဆိုရင် မန်းလေးမြို့မှာ ပွဲလမ်းသဘင်တွေစတော့မယ်ဆိုတာကို အသိပေးလိုက်တာပါဘဲ။ဒီအချိန်ရောက်တာနဲ့ကျနော်တို့ကတော့ ဘုရားပွဲတကာသွားမယ် အငြိမ့်ကြည့်မယ် ဇာတ်ကြည့်မယ် အသိမိတ်ဆွေအိမ်တွေမှာမုန့်လိုက်စားမယ်ဆိုတာတွေလုပ်ဘို့ အသင့်ပြင်ကြပါတော့တယ်။

ဒီမန္တလေးမြို့ဘုရားပွဲတွေကမမေ့နိုင်စရာ ကျနော့်ငယ်ဘ၀နဲ့အများကြီးပါတ်သက်နေပါတယ် ၊ကျနော်အဖေ့ရဲ့မိဘများက ပန်းကန်တွေ စားပွဲခုံတွေကို ပြန်ငှားတဲ့အလုပ်ကိုလုပ်ပါတယ်။သာမန်အလှူအတန်းတွေကလာငှားတယ်ဆိုရင် ငှားခအတွက် အဖိုးအခကိုသတ်မှတ်ထားတဲ့ကြေးနဲ့ယူပါတယ်။ ရပ်ကွက် ဘုရားပွဲတွေက လာငှားတယ်ဆိုရင် ဘုရားပွဲအတွက်လှူဒါန်းထားကြတဲ့ ဆွမ်းတော်ကြီးပွဲရဲ့တစ်ဝက်ကိုကျနော်တို့ကယူပါတယ်။

ဆွမ်းတော်ကြီးပွဲဆိုတာကတော့ ဘုရားပွဲကျင်းပတဲ့ ရပ်ကွက်ထဲမှာနေထိုင်သူတွေက လှူဒါန်းဘို့အတွက် မုန့်တွေ အသီးအနှံတွေ ဆွမ်းဟင်းတွေကို ဘုရားပွဲရက်မတိုင်ခင်တစ်ရက်မှာ ဘုရားထဲကိုလာပြီးပို့ထားရပါတယ်။ လာပို့ထားကြတဲ့ ဆွမ်းတော်ပွဲတွေကို လှူဒါန်းတဲ့လူတွေကြည့်ပြီးပီတိဖြစ်ရအောင်ဘုရားပွဲကို လာကြည့်တဲ့သူတွေ မြင်ရတွေ့ရအောင် ရည်ရွယ်လုိ့ဘုရားကိုကပ်လှူရင်းစားပွဲကြီးတွေပေါ်မှာခင်းကျင်းလို့ပြထားပါတယ်။

တစ်ချို့ကတော့ ဈေးကြီးပြီးရှားပါးတယ်ဆိုတဲ့ နံ့သာပုငှက်ပျောတို့ ရွှေနီငှက်ပျောတို့ကို အဖီးလှလှကြီးတွေကိုလှူထားပါတယ်။ တစ်ချို့ကတော့ဘဲဥကိုပြုတ်ပြီးတော့လူအရုပ်ပုံဆေးရောင်စုံခြယ်လို့ လှတပတလေးဖြစ်အောင်လုပ်ပြီးတော့လှူပါတယ်။ ငယ်ငယ်တုံးကအဲဒီဘဲဥလေးများရလို့ကတော့ မစားနိုင်မသောက်နိုင် တကိုင်ကိုင်နဲ့အရမ်းကိုမက်မောခဲ့ရတာပါ။

တစ်ချို့ကြတော့လဲပုဇွန်ထုပ်အကြီးကြီးတွေကိုလှနေအောင်ပြင်ပြီးလှူထားတတ်ကြပါတယ်။ တစ်ချို့ကတော့လည်းဝက်သားသုံးထပ်သားပေါင်သား အကြီးကြီးကိုကြော်ထားတာ တစ်ချို့ကကြက်အကောင်လိုက်ဘဲအကောင်လိုက်ငါးအကြီးကြီးအကောင်လိုက်ကြော်ထားတာတွေကို မြင်ရတဲ့ကလေးတွေသွားရည်ကျလောက်အောင်ကို လှူထားတတ်ကြပါတယ်။

ဘာဘဲပြောပြော” အရပ်ဘုရားပွဲဟေ့”ဆိုတာနဲ့ သူများရပ်ကွက်ထက် မသာတောင် မနိမ့်အောင်လှလှပပဖြစ်အောင် လှူကြတာများပါတယ်။ဒီဆွမ်းတော်ပွဲတွေကို ဘုရားပွဲတော်ကျင်းပပြီးတဲ့အခါမှာ လှူဒါန်းထားတဲ့အထဲက မုန့်ပဲသွားရေစာတွေအသီးအနှံတွေကို ဆွမ်းတော်ပွဲကျအဖြစ်သတ်မှတ်လို့ အန္တရာယ်ကင်းအောင်အရပ်ထဲကကလေးတွေကိုဝေပါတယ်။ ကြိုတင်လို့ဖယ်ထားတဲ့လှူဘွယ်တွေကိုရပ်ကွက်ကကိုးကွယ်တဲ့ဆရာတော်ဘုရားရဲ့ကျောင်းကို
ပို့လို့လှူဒါန်းပါတယ်။

ကျနော်တို့မိသားစုက ပုဂံတွေ စားပွဲတွေငှားထားတဲ့ဘုရားပွဲကျင်းပတဲ့ဆီကို ဘုရားပွဲမပြီးခင်တစ်ရက်အလိုမှာသွားပြီး ဆွမ်းတော်ကြီးပွဲကိုစာရင်းခွဲပါတယ်။အများအားဖြင့်အသီးအနှံတွေမုန့်တွေကိုယူပြီးဆွမ်းဟင်းကိုမယူပါဘူး။ ဘုရားပွဲပြီးတဲ့မနက်ရောက်တာနဲ့မြင်းလှည်းတွေနဲ့သွားပြီး ကျနော်တို့ကငှားထားတဲ့ ပစ္စည်းတွေရယ် သူတို့ငှားခအဖြစ်ပြန်ပေးလိုက်တဲ့ဆွမ်းတော်ကြီးပွဲတွေရယ်ကိုသွားသယ်ကြပါတယ်။

အဲဒီလိုရလာတဲ့မုန့်တွေအသီးအနှံတွေကို ထန်းခေါက်တောင်းတွေနဲ့ထည့်လို့ တစ်ခါတစ်ခါသယ်ရင် ရပ်ကွက်ကြီးရင် ကြီးသလိုမြင်းလှည်း လေးငါးစီးတိုက်သယ်ရပါတယ်။ အိမ်ရောက်တာနဲ့ အဖွားက ဒါတွေကိုပြန်လှူဘို့အတွက် ဒါကတော့ ဘယ်ပို့မှာ ဟိုဟာကတော့ ဘယ်အတွက် ဒါကတော့ ကလေးတွေကို ဝေဘို့ဆိုပြီး ခွဲတမ်းချစီစဉ်ပါတော့တယ်။

အရပ်ထဲကကလေးတွေကို အိမ်ရှေ့မှာတန်းစီခိုင်းပြီး လိမ္မော်သီး၊သီးမွှေးငှက်ပျောသီး၊ကမ္ဘလာသီး စတာတွေကို ဝေပါတော့တယ်။ဘယ်ကလေးလာလာ ဘယ်အရပ်ကဖြစ်ဖြစ်အကုန်ဝေတာပါ။နောက်မှဆွေမျိုးတွေအိမ်ကိုပို့ခိုင်းပါတယ်။ ကျနော်တို့အဖွားကဒီပစ္စည်းငှားတဲ့အလုပ်ကစလုပ်ကတည်းကရည်ရွယ်ချက်ကလှူချင်လို့ပါ။

ဆွမ်းတော်ပွဲအကျတွေကို မင်းကွန်းလူအိုရုံ၊မနော်ယမံကိုယ်ရေပြားရောဂါသည်ဆေးရုံ၊မိဘမဲ့ကလေးကျောင်းသုံးကျောင်းကို တစ်လှည့်စီပို့လို့လှူဒါန်းပါတယ်။ ဒီလိုသွားပြီ မုန့်တွေပို့ပြီဆိုတဲ့နေ့ကျရင် ကျနော်တို့တစ်အ်ိမ်သားလုံး မြင်းလှည့်းတွေနဲ့ လှူဘို့အလှည့်ကျတဲ့နေရာကို တစ်ပျော်တပါးကြီးသွားကြတာပါ။ ငယ်ငယ်ကမင်းကွန်းလူအိုရုံကို မော်တော်လေးနဲ့ ဒီလှူဘွယ်ပစ္စည်းတွေကိုသွားပို့ရတာပျော်စရာပါ။ မော်တော်လေးက တအိအိ ဧရာဝတီမြစ်ကြီးရဲ့လှိုင်းလေးတွေကလည့် တအိအိ ပြန်တွေးရင်လွမ်းဘို့ကောင်းပါတယ်။

ကျောက်တော်ကြီးဘုရား

ဒီ ကျောက်တော်ကြီးဘုရား ပွဲမကျင်းပခင်15ရက်လောက်အလိုကတည်းက ဘုရားပါတ်ဝန်းကျင်မြေကွက်လပ်တွေမှာ ရုံသွင်းမယ့် ဇာတ်အဖွဲ့တွေအတွက်မင်းစင်တွေ ဇာတ်ရုံတွေဈေးသည်တွေအတွက်ဆိုင်ခန်းတွေကိုစဆောက်ပါပြီ။ ဟိုးအဝေး အောက်ပြည်ကနေလာရောင်းကြတဲ့ “ဖျာသယ်”တွေကလည်းဘုရားပွဲမတိုင်ခင်ကြိုတင်လို့ရောက်လာပါပြီ။ ပြီးရင် လယ်သမားသုံး၊တောင်သူသုံးပစ္စည်းတွေ၊သံထည်ပစ္စည်းတွေရောင်းတဲ့ဆိုင်တွေရောက်လာပါတယ်။
နောက်ပွဲတော်ရက်နဲ့တော်တော်လေးကပ်လာပြီဆိုတော့ မှ ” စာကလေးငှက်ပျောတို့ ရခိုင်ငှက်ပျောတို့ငှက်ပျောချဉ်တို့ကိုရောင်းတဲ့ငှက်ပျောသီးသယ်တွေရောက်လာပါတယ်။

သူ့နောက်မှာမှဒီပြင့်နတ်ပွဲတွေကနေကူးလာတဲ့“ကရေကယာ“တို့”စလူမုန့်(ခ)အညာသားကျောကုန်း”မုန့်သည်တွေရောက်လာပါတယ်။ ဘုရားပွဲတော်ရက် ရောက်ပြီဆိုမှ ကလေးဘ၀ကမက်မက်မောမောစားခဲ့ရတဲ့ “မုန့်သိုင်းခြုံ“သယ်တို့“အကြော်ဆိုင်”တွေကအလျိုလျိူရောက်လာတတ်ပါတယ်။ ဒီအကြော်ဆိုင်တွေကလည်းပါချီပါချက် မထင်ပါနဲ့ ဆိုင်ခန်းအကြီးကြီးထဲမှာ မိုးဗြဲဒယ်လို ဒယ်အိုးအကြီးကြီးနဲ့ အကြော်မျိုးစုံကို ကြော် ဗန်းတွေထဲမှာထည့်ထားတာကိုက စားချင်စရာပါ။ ချထားလိုက်တဲ့ စားပွဲခုံဝိုင်းလေးတွေကလဲအများကြီး လက်သုတ်ပုဝါအရှည်ကြီးတွေကို တိုင်တွေမှာချည်ထားတာပါ။

ရန်ကင်းတောင်

အကြော်ပူပူနွေးနွေး ကောင်းညင်းပေါင်း ကောက်ညှင်းကျည်တောက်ကြော် အချဉ်ရည်နဲ့ ရေနွေးကြမ်းပူပူ တွဲဖက်လို့ စားခဲ့ရတာများ ပြန်စဉ်းစားတာနဲ့ မျက်စေ့ထဲမှာပွဲခင်းကြီးကိုမြင်လာပါတယ်။ မန်းလေးသူမန်းလေးသားတွေကလည်း သင်ဖျုးဖျာတွေ နှီးချောဖျာတွေကို ဒီပွဲတော်ကိုရောက်မှ သာဝယ်ကြပါတယ် စောင့်ကိုဝယ်ကြတာပါ။ တစ်ချို့ကတော့လည်းဘုရားပွဲတော်ရက်အတွင်းမှာ မ၀ယ်ဘဲ ပွဲတော်ကြီးပြီးပြီဆိုမှ ဇွတ်ကိုဈေးဆစ်ပြီး ၀ယ်ကြတာတွေလဲရှိပါတယ်။

ကုသိုလ်တော်ဘုရားများ

ဟိုအရင်ကမန္တလေးတောင် ရန်ကင်းတောင်တို့ရဲ့ အရှေ့ဘက်ခြမ်းမှာရှိကြတဲ့ ရွာတွေမှာနေထိုင်ကြသူတွေက တစ်နှစ်လုံးအတွက်လိုအပ်တဲ့လယ်ယာလုပ်ငန်းသုံးပစ္စည်းတွေ ကြာကြာအထားခံတဲ့ စားသောက်ကုန်အခြောက်အခြမ်းတွေ၊လူသုံးကုန်ပစ္စည်းတွေကို ဒီကျောက်တော်ကြီးဘုရားပွဲကျမှ ၀ယ်ကြပါသတဲ့။ အဲဒီဘက်တွေမှာနေကြတဲ့ နယ်သူနယ်သားတွေကလဲ ဒီကျောက်တော်ကြီးဘုရားပွဲကို ဘယ်လိုဆင်နွဲလိုက်မယ်ဆိုတာကို ကြိုတင်လို့ ပြင်ဆင်ထားကြပါသတဲ့။

တစ်နှစ်ပါတ်လုံးအလုပ် ပင်ပင်ပန်းပန်းလုပ်ခဲ့ရသမျှကို ဒီပွဲတော်ကြီးကျမှ ၀ယ်မယ်ခြမ်းမယ် သုံးမယ် အငြိမ့်တွေဇာတ်တွေကြည့်ကြမယ် ဆိုပြီးစိတ်ကူးတွေယဉ်ရုံမက သုံးစရာငွေပါ စုထားပါသတဲ့။ ပွဲတော်ကြီးပြီးလို့ ကိုယ်နယ်ကိုယ်ပြန်ရောက်မှ ဒီပွဲတော်ကြီးအကြောင်းကို အတူသွားတဲ့လူအချင်းချင်းလဲ ပြော မလိုက်ခဲ့တဲ့သူကိုလဲ လွမ်းနေအောင်ပြောနဲ့ “ပြောမဆုံးပေါင်တောသုံးတောင် “ဇာတ်လမ်းခင်းကြပါသတဲ့။

ဒီတော့လဲ ကျောက်တော်ကြီးပွဲတော်ကြီးက မန္တလေးမြို့သာမကဘဲ ရွာနီးစပ်ချုပ်နယ်တွေရွာတွေနဲု့ဆိုင်တဲ့ နယ်လုံးဆိုင်ရာပွဲတော်ကြီးဆိုတော့ စည်မှစည်ပေါ့နော်။ ဒါကြောင့်လဲဒီပွဲတော်ရက်ရောက်ပြီဆိုတာနဲ့ သုဓမ္မာဇရပ်အားလုံးလူအပြည့် လှည်းဝိုင်းကြီးတွေ အပြည့် နေရာကွက်လပ်မှန်သမျှ ကိုယ်အစုနဲ့ကိုယ်ချက်ပြုတ်စားသောက်နေကြတာ တစ်ပျော်တစ်ပါးကြီးပါ။ ညပိုင်းရောက်ရင်လဲ လှည်းဝိုင်းနံဘေးမှာ ပွဲမကြည့်ဘဲ အစောင့်ကျန်ခဲ့တဲ့လူကြီးတွေက မီးဖိုလေးပုံ မီလေးလှုံလို့ နေကြပါတယ်။

အဲဒီအချိန်တွေတုံးက ကျောက်တော်ကြီးဘုရားပွဲရောက်တယ်ဆိုရင် ဆောင်းအအေးဓါတ်က စလို့ဝင်လာပြီလေ။ အမှန်က ကျောက်တော်ကြီးဘုရားပွဲလို့သာပြောလိုက်တာ ဒီဘုရားနဲ့တစ်ဆက်ထဲဖြစ်နေတဲ့ “စန္ဒာမုနိ”နဲ့ “ကုသိုလ်တော် “ဘုရားပွဲတော်တွေကိုပါတစ်ဆက်တည်းကျင်းပကြတာပါ။ ကျနော်တို့ ငယ်ငယ်ကတော့ လူကြီးမိဘတွေနဲ့ ကျောင်းသားဘ၀ရောက်တော့ သူငယ်ချင်းတွေနဲ့ အလုပ်ထဲရောက်တော့ လုပ်ဖော်ကိုင်ဘက်တွေနဲ့ တစ်နှစ်မပျက်ဆင်နွဲခဲ့ဘူးပါတယ်။

ကျုံးမြောက်ဘက် သုဓမ္မာဇရပ်တန်းနားမှာစက်ဘီးအပ် မြောက်ကျုံးအစကနေပွဲခင်းကြီးထဲကို စ၀င်လိုက်တယ်ဆိုရင်ဘဲ ဖျာသယ်တွေ ကရေကယာသည်တွေ ကလေးတွေအကြိုက်အရုပ်ဆိုင်တွေကို ဖြတ်ပြီး ပွဲခင်းထဲကိုရောက်ပါပြီ။ဇာတ်ပွဲစဘို့အချိန်စောသေးတယ်ဆိုရင် ကျောက်တော်ကြီးဘုရားရဲ့အရှေ့ဘက် က “စန္ဒာမုနိ”နဲ့ “ကုသိုလ်တော် ” ကြားကွက်လပ်တွေမှာ သက်ဆိုင်ရာရပ်ကွက်တွေအလိုက် ဆောက်ထားကြတဲ့ ဧည့်ခံမဏ္ဍပ်တွေကတစ်ဆက်ထဲအရှည်ကြီးပါ။

ကုသိုလ်တော်ဘုရား

ဒီပွဲတော်ရက် မတိုင်မှီကတည်းက ဧည့်ခံကြမယ့် သူတွေက ကိုယ့်အသိမိတ်ဆွေမှန်သမျှကို လာဘို့ ဖိတ်ခေါ်ထားကြပြီးသားပါ။ မဏ္ဍပ် တွေကလည်း တစ်ခုနဲ့တစ်ခု အပြိုင်အဆိုင်ကြွေးကြ လိုလေသေးမရှိဧည့်ခံကြတာပါ။ ကြာဇံဟင်း၊ခနုံထုပ်၊ထိုးမုန့်၊လက်ဖက်၊လိမ္မော်သီး၊သီးမွှေးငှက်ပျောသီး၊ကမ္ဘလာသီး အစရှိတဲ့ရာသီပေါ်အသီးအနှံတွေနဲ့ဧည့်ခံကြပါတယ်။ မဏ္ဍပ် တိုင်းမှာ မပါမဖြစ် စားစရာကတော့ ဆီးဖြူသီးဆားရေစိမ်နဲ့ ငပိကြော်ပါဘဲ။

စန္ဒာမုနိဘုရား

အေးမြတဲ့ရာသီဥတုနဲ့ အလွန်လိုက်ဖက်တဲ့အစားအစာပါ။ဆီးဖြူသီးလေးကို တကိုက်ကိုက်လိုက် ငပိကြော်လေးကိုကော်ယူလိုက် ပြီးရင်စားလိုက် သိပ်ကိုအရသာရှိတဲ့အစား အစာဆိုတာကိုတော့ စားဖူးတဲ့သူတိုင်း အခုလောက်ဆိုရင် ကို သွားရည်ကျနေလောက်ပါပြီ။

ဒီဘုရားပွဲတော်တစ်ရက်ညနေစောင်းလေးတစ်ခု 16လမ်းမှာနေတဲ့ အပျိုတစ်သိုက်ကလဲ အပျိုခေါင်းတွေက ဦးဆောင်လို့ လှည်းယာဉ်တွေနဲ့ ကျောက်တော်ကြီးပွဲကို ပွဲကြည့် ဘို့ အုပ်စုလိုက်ကြီးလာခဲ့ပါသတဲ့။ သူတို့လှည်းတန်းကြီးနောက်ကို ပွဲတော်ကို စက်ဘီးနဲ့လာကြတဲ့ ကာလသားတစ်သိုက်နဲ့ အနောက်ကျုံးဒေါင့်မှာ စပြီး ဆုံတယ်ဆိုကတည်းက တောက်လျှောက်လိုက်လာပါသတဲ့။

စန္ဒာမုနိဘုရားများ

တစ်ခုသောလှည်းနောက်မြီးမှာ ခြေတွဲလောင်းချပြီး လိုက်လာတဲ့ အသားညိုညိုနဲ့ မိန်းကလေးကို လှည်းနောက်ကို အသားလတ်လတ် အရပ်မြင့်မြင့်နဲ့လူတစ်ယောက် က စက်ဘီးနဲ့ကပ်လိုက်လာပြီး တတွတ်တွတ်ပြောနေပါသတဲ့။ လှည်းပေါ်ကကောင်မလေးကလည်း ပါလာတဲ့အဖော်တွေက ၀ိုင်းစတော့ ရှက်နေပါသတဲ့။ သေချာများကပ်နားထောင်လိုက်ရင် အခုခေတ်က” ရဲလေးနဲ့ အစ္စဏီ “တို့ လို ” ကောင်ကလေးက ကောင်မလေးကို ရီးစားဖြစ်ဘို့ခွင့်တောင်းရင် ကောင်မလေးရဲ့စိတ်မှာ ဘယ်လိုဖြစ်သွားမလဲ” ဆိုတဲ့သီချင်းလေးအတိုင်းဖြစ်သွားမယ်ထင်ပါတယ်။

အဲဒါကတော့ ကျနော် ကိုပေါက် လူပြည်ကို ရောက်လာဘို့ ဇာတ်လမ်းလေးရဲ့အစဘဲလို့ အမေရဲ့အဒေါ် ကျနော်ကြီးကြီးက ကျနော်တို့ကို ပုံပြောသလိုပြောပြဘူးလို့လဲ သိနေရတာပါ။

ဒီကျောက်တော်ကြီးဘုရားပွဲ ပြီးသွားလို့ကတော့ နယ်ကလာတဲ့လူတွေမပြောနဲ့မန်းလေးသူမန်းလေးသားတွေတောင် ညတိုင်းအိပ်ပျက်ခံပြီးကြည့်ခဲ့ ရတဲ့ ဇာတ်ပွဲက မင်းသားတွေရဲ့ဆိုပုံ ငိုပုံ ကပုံ ချွဲနွဲ့လို့ ပြောတဲ့အသံလေးတွေကို တစ်ယောက်တည်းစဉ်းစားပြီးခံစားရုံမကဘူး အဖော်တွေစုလို့ ပြန်ပြီးပြောကြရတာ အမောပါဘဲ။ တစ်ခါတစ်ခါ အဘွားက နားကြားပျင်းကပ်လာရင် “မင်းသားကဖြင့် သူ့အိမ်ပြန်ရောက်လို့ သူ့မ်ိန်းမနဲ့ နောက်ကလေးတောင်မွေးတော့မယ် ညည်းတို့က စားမြုံ့ပြန်မပြီးကြသေးဘူးလား” လို့ အငေါ်တူးပါသတဲ့။ဒါပေမယ့်လည်းပြောကြတာပါဘဲ။

အဲဒီခေတ်က ကြည့်ရူ့ခံစားစရာကလည်းရှားတာကိုး။ ရွှေမန်းတင်မောင်။စိန်အောင်မင်း၊စိန်မာဒင် ဟော သူတို့အဖေတွေခေတ်ကိုလွန်လာတော့ ညွန့်ဝင်း၊၀င်းဗိုလ်၊ဆန်းဝင်း၊ချမ်းသာ၊ပန်တျာကြည်လင်၊ မိုးဝင်း ၊မိုးမင်း နောက်တော့ မန်းလေးသိန်းဇော် ဘီအီးဒီအောင်သိုက် မျိုးဆက်တစ်ဆက်ပြီးတစ်ဆက် တစ်ခေတ်ပြီးတစ်ခေတ် ကပြခဲ့ကြ အားပေးခဲ့ကြပါတယ်။ မန်းလေးမြုိ့အကြောင်းပြောမယ်ဆိုရင် ဘုရားပွဲ ဇာတ်နဲ့ အငြိမ့်တွေ စတိတ်ရှိုးတွေက မပါရင်မပြီးတဲ့အကြောင်းတွေပါ။ မန်းလေးမြုိ့က ဘုရားပွဲတွေဆိုတာ တစ်ရပ်ကွက်နဲ့တစ်ရပ်ကွက်အပြိုင်အဆိုင် သူ့ထက်ငါသာအောင် အကြီးအကျယ်ကို ကျင်းပခဲ့ကြတာပါ။

ဘုရားပွဲမတိုင်ခင်ကတည်းက အရပ်ထဲကဦးဆောင်ဦးရွက်လုပ်နိုင်သူက လောဆော်လို့ အလှူငွေတွေကောက် ဇာတ်တွေငှား မင်းစင်လက်မှတ်တွေကို ရောင်းနဲ့ ဘုရားပွဲမတိုင်ခင် လပေါင်းများစွာထဲက ကြိုတင်လို့ အပင်ပန်းခံစီစဉ်ကြသလို ရပ်ကွက်သူရပ်ကွက်သားတွေကလည်း (ဘုရားပွဲကျရင်) ဆိုတဲ့အတွေးလေးတွေနဲ့ ပျော်ပျော်ကြီးဆင်နွဲဘို့ စုကြဆောင်းကြ ပြင်ဆင်ကြရတာပါ။ နောက်လူကြီးမိဘတွေကလည်း ဖိတ်ကြားထားတဲ့ အသိမိတ်ဆွေမှန်သမျှကို ဘုရားပွဲရက်မှာဧည့်ခံဘို့အတွက် တစ်အိမ်နဲ့တစ်အိမ်မထပ်ရအောင် သူထက်ငါသာအောင် ဧည့်ခံဘို့ ခေါင်းစားကြပါတယ်။

ကျနော်တို့ကလေးတုံးက ဆော့ဘို့ ပွဲကြည့်ဘို့ အိမ်ပေါက်စေ့ မုန့်လိုက်စား ဘို့လူပျိုပေါက်လေးအရွယ် ရောက်လာတော့ တစ်နှစ်လုံးအ်ိမ်တွင်းပုံးနေတဲ့ ရွက်ပုံးသီးအပျိုချောလေးတွေကို ရူ့စားဘို့ အားတွေခဲထားကြသလို၊ အပျိုကြီးမမ အပျုိးလေး လှလှတို့ကလဲ ဘုရားပွဲရောက်ရင် ဘယ်လိုအလန်းဇယားတွေဖွင့်မယ်ဆိုတာကို ကြံစည်နေကြပါတယ်။ သီတင်းကျွတ်လို့ ဘုရားပွဲရာသီစပြီဆိုတာနဲ့မန်းလေးတစ်မြို့လုံးက လှုပ်လှုပ်ရွရွနဲ့ အသက်ဝင်နေပါတော့တယ်။

အရင်တုံးက ဘုရားပွဲဆိုရင် မိတ်ဆွေသင်္ဂဟတွေက တစ်ရပ်ကွက်နဲ့တစ်ရပ်ကွက် အပြန်အလှန်ဖိတ်လို့ သွားကြ စားကြတာ အင်မတန်မှချစ်စရာကောင်းသော ဓလေ့ထုံးစံလေးအဖြစ်ရပ်တည်ခဲ့ပါတယ်။ ကျနော်တို့မန်းလေးသားတွေရဲ့စိတ်ထဲမှာ( ကြာဆံဟင်း)ဆိုတဲ့အရာ ၀ယ်စားစရာမလိုတဲ့ အစားအစာအဖြစ်သတ်မှတ်ထားပါတယ်။ ဘုရားပွဲဆိုတာနဲ့အိမ်တိုင်းနီးပါးလောက်က ကြာဇံဟင်းနဲ့ဧည့်ခံတော့ အ၀အပြဲတီးကြတာကိုးဗျ။

နောက်ဒီဘုရားပွဲကနေမှီပြီးပေါ်လာတာလေးတစ်ခုကတော့ (ရန်ပုံငွေလက်မှတ်)ရောင်းတယ်ဆိုတာလေးပါ။ အရင်ကတော့ ဘုရားပွဲဆိုတာနဲ့ အသိမိတ်ဆွေအိမ်လည်ပြီးဝင်စားလိုက်ရုံပါဘဲ။ နောက်ဘယ်သူစထွင်လိုက်မှန်းမသိတဲ့ ရပ်ကွက်ရန်ပုံငွေဈေးရောင်းပွဲဆိုတာကြီးပေါ်လာပါတယ်။ ကူပွန်လက်မှတ်တစ်စောင်ကို တစ်ကျပ် နှစ်ကျပ် စသည်ဖြင့်တန်ဘိုးသတ်မှတ်လို့ရောင်းပါတယ်၊ နောက်ရန်ပုံငွေလက်မှတ်ရောင်းထားတဲ့ဆိုင်မှာ သွားပြီး လက်မှတ်ပြလို့မုန့်စားပေါ့။ အစကတော့ ကိုယ်ဝယ်ချင်သလောက် ၀ယ်ပေါ့ ခင်မင်သိကျွမ်းသူခြင်းလောက်ဘဲရောင်းကြတာပါ။ နောက်ကျတော့ ဈေးချိုထဲက ဆိုင်တစ်ဆိုင်ဘယ်လောက် ဘိုးဝယ်ရမယ်ဆိုတဲ့ သတ်မှတ်ချက်တွေနဲ့ ဇွတ်ကိုရောင်းပါတော့တယ်။

အဲလိုရာသီမျုိးရောက်ရင် ကျနော်တို့လက်ထဲမှာ ရန်ပုံငွေလက်မှတ်ကူပွန်တွေကို ဖွေးလို့ပါ။ မသွားနိုင်ပေမယ့်လဲ ၀ယ်ထားရတဲ့သူတွေက သွားမယ့်သူတွေကိုပေးထားတာပါ။ ဒီအထဲကနေများ ကိုယ်အီနေတဲ့ကောင်မလေးကများ ဘယ်ဆိုင်မှာ လုပ်အားပေးဈေးရောင်းရမယ်ဆိုတဲ့ သတင်းရလို့ကတော့ ဘုရားပွဲရက်အတွင်းနေ့တိုင်းသွားနိုင်အောင် အဲဒီဆိုင်က ကူပွန်တွေကိုရအောင်ရှာလို့ ၀ယ်သင့်တာဝယ် လဲသင့်တာလဲလို့ ဖန်ရပါတော့တယ်။

မန်းလေးက ရပ်ကွက်ဘုရားပွဲတွေက တော့ နှစ်ရက် ဒါမှမဟုတ်သုံးရက်ကျင်းပလေ့ရှိပါတယ်။ မန်းလေးသူမန်းလေးသားကတော့ ဆောင်းရောက်ရင် ဘုရားပွဲ နွေရောက်တော့ သင်္ကြန် ရိုးရာမပျက်ဆင်နွဲဘို့အားခဲထားကြတာပါ။ ဘုရားနဲ့နီးတဲ့အရပ်က ဘုရားပွဲ ၊တစ်ချို့ ရပ်ကွက်ဓမ္မာရုံရှိတဲ့အရပ်ကလဲ ဓမ္မာရုံ ကိုမှီပြီးဘုရားပွဲကျင်းပတတ်ကြပါတယ်။

ရပ်ကွက်ဓမ္မာရုံတို့ ဘုရားတို့ မရှိတဲ့အနီးအနားအရပ်တွေက ရှိတဲ့အရပ်နဲ့ပေါင်းလို့ကျင်းပကြပါတယ်။ ဒီလိုကျင်းပနေကြရင်းက တစ်ရပ်ကွက်နဲ့တစ်ရပ်ကွက်ပေါင်းလို့ကျင်းပနေရင်းက တစ်ရပ်နဲ့တစ်ရပ် တစ်ဦးနဲ့တစ်ဦးလုပ်ရင်းကိုင်းရင်းသူ့ဘက်ကိုယ်ဘက်အဆင်မပြေတာလေးတွေပေါ်လာကြပါတယ်။ ဒီဘက်ရပ်ကွက်က ဒီအငြိမ့် ဒီဇာတ်ထည့်မယ် ဟိုဘက်က ဒီပြင်ဇာတ်ထဲ့မယ် ဒီအငြိမ့်ဘဲနှစ်တိုင်းငှားနေတာ ဒီကျောင်းကိုမလှူဘူး ဟိုကျောင်းကိုလှူမယ်ဆိုတာလေးတွေက စလို့ သဘောကွဲလွဲလာတဲ့အခါ တွေရှိလာပါတယ်။

အဲဒီအခါမှာ ဘုရားနဲ့ဝေးတဲ့အရပ် ဓမ္မာရုံမရှိတဲ့အရပ်တွေက သူတို့ကိုယ်သူတို့ သိမ်ငယ်တယ်လို့ထင်ပါတယ်။ ဘုရားတည်ဘို့ဆိုတာ ကတော့ ခက်ခဲတဲ့အလုပ်ပါ။ ဓမ္မာရုံဆောက်ဘို့ကလဲ ငွေတတ်နိုင်တယ်ထားရပ်ကွက်ထဲမှာနေရာရှိပါမှကိုး။ အဲဒီအခါမှာ ကိုယ်အရပ်နဲ့ကိုယ် သတ်သတ် လုပ်ချင်ကိုင်ချင်ဆောင်ရွက်ချင်တဲ့ သူတွေက ရှေးကရှိပြီးသားကို မွမ်းမံလို့ အကောင်အထည်ဖော်လိုက်တာကတော့
သီတင်းကျွတ်ပွဲတော်ကြီး ပြီးတော့ တန်ဆောင်မုန်းတန်ဆောင်တိုင် ဆီမီးကမြိုင် မသိုးမြတ်သင်္ကန်းနဲ့……………..ကထိန်ပွဲခင်းပါတဲ့လတန်ဆောင်တိုင်………..မြိုင်မြိုင်ဆိုင်ဆိုင် လတန်ဆောင်တိုင် “လို့ဆိုထားခဲ့ဘူးတဲ့ ကိုမြကြီးသီချင်းထဲကလို
တန်ဆောင်မုန်းရောက်ပြီဆိုတာနဲ့ “ကထိန်ပွဲတော် “ကိုဆင်နွဲဘို့ပြင်ဆင်ကြပါတော့တယ်။

ဒီတန်ဆောင်မုန်းလပြည့်နေ့မတိုင်ခင်မှာ သံဃာတော်တွေသီတင်းသုံးတဲ့ကျောင်းတွေကို ကထိန်သင်္ကန်း ကပ်လှူကြပါတယ်။
ဒီကထိန်အလှူတော်ကို လက်ခံရတဲ့ကျောင်းမှာလည်း တိကျသတ်မှတ်တဲ့စည်းကမ်းချက်တွေနဲ့ပါ။
ပထမဦးဆုံးလာပြီး ကထိန်အလှူတော်ကို လက်ခံပြီးရင် နောက်ထပ်အလှူကိုလက်မခံရပါဘူးတဲ့။
ဆိုလိုတာက ပထမလာပြီးလှူတဲ့လူက လှူဘွယ်နည်းမယ် ဒါပေမယ့် လက်ခံပြီးတယ်ဆိုရင် နောက်လာလှူမယ့်သူက ဘယ်လောက် လှူဘွယ်များများပြောင်းပြီးလက်ခံလို့မရတာပါ။

တန်ဆောင်မုန်းလဆန်းပြီဆိုကတည်းက ကထိန်ခင်းမယ့်အဖွဲ့တွေက ကိုယ်ကထိန်ခင်းချင်တဲ့ကျောင်းကို ရှာလို့ ကြိုတင်လျှောက်ထားရပါတယ်။
တစ်ချို့ကကြတော့လဲ ဘယ်ကျောင်းကို လှူမယ်ဆိုတာကို ကြိုတင်လို့ ရှာမထားဘဲ ကထိန်ခင်းချင်တဲ့နေ့ကျမှ လှူဘွယ်ပစ္စည်းတွေကို တင်လို့ ကထိန်လက်မခံရသေးတဲ့ကျောင်းကို ရှာလို့ ပုံတိုက်ပြီးလှူလိုက်ပါတယ်။ အဲလိုလှူတာကိုတော့ “မိုးပေါ်ကျ ကထိန် “လို့ခေါ်ပါတယ်။

အများအားဖြင့်ကတော့ကထိန်လှူဘွယ်ပစ္စည်းတွေကို ကထိန်ခင်းမယ့်ကျောင်းကို မပို့ခင်မှာ လှပအောင် မျက်စိပသာဒဖြစ်အောင် ခင်းကျင်းလို့ထားကြပါတယ်။
အဖိတ်နေ့ရောက်ပြီဆိုမှ ဒီခင်းကျင်းထားတာတွေကို ကားတွေနဲ့တင်ပြီး မဲကျရာကျောင်းတိုက်ကို သွားပို့ကြပါတယ်။
အဲဒီကျောင်းတိုက်မှာ ကထိန်ခင်းတဲ့အဖွဲ့တွေ ကအဲဒီကျောင်းမှာ ညအိပ်လို့ချက်ပြုတ်စားကြ ညကျတော့ ကုလားကြည့်ကြပေါ့(ဖဲရိုက်တာကိုပြောတာပါ)။
တစ်ချို့ကတော့ တီးဝိုင်းတွေ အငြိမ့်တွေထည့်လို့ ဧည့်ခံပြန်ပါသေးတယ်။

မနက်မိုးလင်းတော့ ကျောင်းကသံဃာတော်တွေကို ဆွမ်းကပ်လို့ ညနေမှ ပြန်ကြပါတယ်။
တစ်ပျော်တစ်ပါးကြီးပေါ့ ။
သူများရပ်ကွက်နဲ့ပေါင်းလို့ ဘုရားပွဲမကျင်းပချင်တဲ့သူတွေကကိုယ့်ရပ်ကွက်နဲ့ကိုယ် ကိုယ့်ခြေကိုယ်လက်ဖြစ်အောင် ရပ်ကွက်ကထိန်လမ်းကထိန်သီးသန့်
ိဖြစ်အောင်ဆောင်ရွက်ကြပါတော့တယ်။

အဲံဒီအချိန်ကစလို့မန်းလေးမှာ ရပ်ကွက်အနှံ့နေရာအနှံ့ ကထိန်ခင်းတာတွေ ခေတ်စားလာပါတော့တယ်။
အခုအချိန်မှာဆိုရင် ရပ်ကွက်အလိုက်တောင်မဟုတ်ဘဲ တစ်မိသားစုထဲ တစ်ဦးထဲ ဒါမှမဟုတ်စိတ်တူရာမိတ်ဆွေတွေစုလို့ အဖွဲ့လေးတွေဖွဲ့လို့
လုပ်ငန်းခွင်မှာအလုပ်လုပ်နေကြတဲ့ ၀န်ထမ်းတွေစုလို့ဘဲဖြစ်ဖြစ် ကထိန်ခင်းလာကြတာကိုတွေ့ရ မြင်ရ ကြားရတာ အတော်ကိုဝမ်းသာစရာကောင်းပါတယ်။
(အမှန်ကတော့ ဒီကထိန်ခင်းတယ်ဆိုတာ က သံဃာတော်တွေအတွက် လိုအပ်ချက်တွေပြည့်စုံအောင်ဖြည့်ဆည်းပေးတာပါဘဲ။)

ဒီကထိန်တွေအကြောင်းပြောရင် မန်းလေးဈေးချိုတော်ကထိန်ကိုထည့်မပြောရင်မပြည့်စုံပါဘူး။
ဟိုအရင်က ကထိန်ရက်ရောက်ပြီဆိုရင်ဈေးချိုတော်တစ်ခုလုံးမှာ လှုပ်လှုပ်ရွရွ ဆူဆူညံညံနဲ့ပေါ့။
ဈေးချိုတော် ဆယ့်နှစ်ရုံလုံးရယ် အောင်ဈေးတန်း ငှက်ပျောတန်း ကိုင်းတန်းဈေး ထီးတိုင်ဈေး သံဖြူတန်း သစ်သီးတန်း ပန်းတန်းအစရှိတဲ့ ဈေးချိုတော်ပါတ်ပါတ်လည်မှာရှိရှိသမျှ ဈေးတန်းတွေအားလုံးက ကထိန်ခင်းကြပါတယ်။

ဒီလိုကထိန်ခင်းနိုင်ဘို့အတွက် တစ်ရက်ကို ဘယ်လောက်ထည့်မယ် ဆိုပြီး ဆိုင်တိုင်းဆိုင်တိုင်းကနေ တစ်နှစ်ပါတ်လုံး နေ့စဉ်အလှူငွေထည့်ထားတဲ့အပြင် ကထိန်ရက်ရောက်တော့ လည်း ကိုယ်တတ်နိုင်သလောက်ထပ်လို့လှူဒါန်းကြပါသေးတယ်။
ကထိန်ခင်းတယ်ဆိုရင် ညှပ်မကြီး ကို အဓိကထားလို့ခင်းကျင်းပါတယ်။
အဲဒီမှာ တန်ဘိုးကြီးတဲ့ ပစ္စည်းတွေပါမယ်။ နောက် ငွေစက္ကူအသစ်တွေကို ပြက္ခဒိန်ပေါ်မှာတို့ ၊ကြည်ညိုစရာကောင်းတဲ့ ဘုရားပုံတော်တွေပုံစံ၊လှပတဲ့ဒေါင်းရုပ်ပုံစံတွေပေါ်အောင်
ငွေစက္ကူအသစ်တွေနဲ့ လှပစွာ ဖန်တီးထားလို့ ညှပ်မကြီးကို အလှဆင်ကြပါတယ်။

ညှပ်မကြီးနေရာက အများအားဖြင့်ဧည့်သည်တွေကို ဧည့်ခံတဲ့နေရာလည်းဖြစ်ပါတယ်။
ပြီးတော့ မှ ညှပ်မကြီး နံဘေးမှာ သုံးထောင့်ပုံစံချိုးထားတဲ့(ထင်းရူးပင်ပုံစံပေါ့) ညုပ်ကလေးတွေမှာ လှူဒါန်းထားတဲ့ လှူဘွယ်ပစ္စည်းတွေကိုလှပအောင် ချိတ်ဆွဲလို့ ဒီဇိုင်းတွေ ပြင်အလှတွေဆင်ကြပါတယ်။
ဒီညှပ်ကလေးတွေမှာတော့ တစ်ချို့ကလည်းညှပ်တစ်ခုကို မိသားတစ်စု ဆိုင်တစ်ဆိုင်က တစ်ဦးတည်းလှူဒါန်းသလို အများစုပေါင်းလှူတာတွေကိုအလျင်းသင့်သလိုချိတ်ဆွဲလို့ ပြင်ဆင်ကြပါတယ်။
ကထိန်ရက်ရောက်တယ်ဆိုရင် ဆိုင်တိုင်းဆိုင်တိုင်းက လာသမျှမိတ်ဆွေသင်္ဂဟတွေကို စားကောင်းသောက်ဖွယ်တွေနဲ့ အပြိုင်အဆိုင်ဧည့်ခံတတ်ကြပါတယ်။

ဈေးချိုထဲမှာရှိတဲ့ ရုံတွေအားလုံးကလည်း ကထ်ိန်ခင်းကြတဲ့နေရာမှာ တစ်ရုံနဲ့တစ်ရုံသူ့ထက်ငါသာအောင် အပြိုင်အဆိုင်လုပ်ကြပါတယ်။
လှူဒါန်းတဲ့ပစ္စည်းသာအောင် ဧည့်ခံကျွေးမွေးတာသာအောင် တင်မကဘူး ကထိန်နေ့လည်ခင်းမှာ နာမယ်ကြီးပေ့ ခေတ်စားပေ့ဆိုတဲ့ အငြိမ့်တွေကို ငှားလို့ ပွဲခင်းတယ်။
တစ်ချို့ခေတ်ဆန်တဲ့ရုံကတော့ စတိတ်ရှိုးထည့်ပါတယ်။
အဲဒီစတိတ်ရှိုးကိုလဲ မန်းလေးမြို့ခံတီးဝိုင်းနဲ့ ရန်ကုန်က နာမယ်ကြီးအဆိုတော်တွေကို ငှားလို့ ကျင်းပကြတာပါ။

ဈေးချိုနှင့် ဈေးချိုပလာဇာ

အဲဒီဈေးချိုရုံထဲက ကထိန်တွေထဲမှာ အကောင်းဆုံးအခမ်းနားဆုံးအစည်ကားဆုံးလို့ပြောရရင်တော့ ရွှေဆိုင်တန်းကထိန်ပါဘဲ။
ဒါပေမယ့်ကျန်တဲ့ရုံတွေကလည်းသူနဲ့သိပ်မကွာအောင် လုပ်နိုင်ကြပါတယ်။
သာတာကတော့ သူတို့ ရွှေဆိုင်တန်းကရောင်းရတဲ့ပစ္စည်းကလဲခပ်ခန့်ခန့့်် လူတွေအနေအထိုင်ကလဲ ခပ်သန့်သန့်ပါ။

ဆိုင်မှာထိုင်တဲ့အပျိုတွေကလဲ ခပ်ချောချောဆိုတော့ လာပြီး ကြည့်သူတွေကလဲ ပေါမှပေါပေါ့ဗျာ။
အခုခေတ်လိုပြောရရင် အလန်းလေးတွေစုနေတဲ့နေရာပေါ့နော်။
ကျနော်တို့ကျောင်းသားဘ၀ကတော့ ဈေးချိုကထိန်ရက်ဆိုရင် နေ့လည်ကျောင်းမတက်တာများပါတယ်။
အငြိမ့်တွေ စတိတ်ရှိုးတွေက နေ့လည်ဆိုကတာကိုး။

ကျနော်တို့က အငြိမ့်ထက် တီးဝိုင်း ကိုမက်တာများပါတယ်။
shells ပါမယ် ယဉ်မွန်ပါမယ် တေးချစ်သူပါမယ် styler ပါမယ် မြို့မပါမယ်။
ဒီအထဲကမှ နော်လီဇာလာမယ် ဘိုဘိုဟန်လာမယ် စိုးပိုင်လာမယ် ဆိုတဲ့အသံတွေနားထောင်လို့ တစ်နေရာပြီးတစ်နေရာကို တရုန်းရုန်းနဲ့သွား အားရပါးရကြည့်၊
ဘိုက်ဆာလာပြီဆိုရှု ခင်မင်ရင်းနှီးတဲ့ဆိုင်တွေကိုသွားမုန့်တွေတစ်ဝတပြဲစား တစ်ဟားဟားနဲ့ပွဲ ထပ်ကြည့်ပျော်စရာအတိပါဗျာ။

အဲဒီရက်များဆိုရင်ဈေးချိုတော်တစ်ခုလုံး အုံးအုံးကြွက်ကြွက် ဆူဆူညံညံလှုပ်လှုပ်ယှားယှားနဲ့ပေါ့။
အဖိတ်နေ့ရောက်ပြီဆိုတာနဲ့လှူဘွယ်တွေကို ကားပေါ်တင်လူတွေကလဲ ကားပေါ်အားလုံးတက်လို့ ဈေးချိုတစ်ခုလုံး
မန်းလေးတစ်မြို့လုံး သက်ကြီးရွယ်အိုနဲ့ ကလေးပေါက်စကလွဲရင် အားလုံး စစ်ကိုင်းကချောင်တွေဆီကို ချီတက်ကြပါတော့တယ်။

အဲဒီအချိန်ဆိုရင် မန်းလေးတစ်မြို့လုံးတိတ်ဆိတ်လို့ကျန်ခဲ့တာ လူမနေဘူးလို့တောင်ထင်ရလောက်အောင်တောင်ခြောက်ကပ်လို့ကျန်ခဲ့ပါတယ်၊
စစ်ကိုင်းတောင်ပေါ်မှာ မန်းလေးက လာတဲ့သူတွေနဲပြည့်နှက်လို့သွားပါတယ်။
ရှိသမျှချောင် ရှိသမျှကျောင်း ကထိန်မခင်းလိုက်ရတဲ့ချောင် မရှိသလောက်ပါဘဲ။
ကိုယ်ကထိန်ခင်းမယ့်ချောင်ကို အုပ်စုလိုက်ကြီးသွားကြပါတယ်။
ပွဲတွေအငြိမ့်တွေခင်းကြ တီးကြမူတ်ကြနဲ့ပျော်စရာကြီးပါ။

ညပိုင်းကြတော့ ၀ါသနာပါသူတွေကလွတ်လွတ်လပ်လပ် အဖမ်းအဆီးမရှိ ဖဲရိုက်ကြပါတယ် ။
ကျနော်တို့သူငယ်ချင်းတွေကတော့ ညနေခင်းကစလို့ စစ်ကိုင်းတောင်ကိုခြေချင်တက်ကြပါတယ်။
နောက်အသိမိတ်ဆွေတွေ ကထိန်ခင်းတဲ့ချောင်တွေကို တစ်ချောင်ပြီးတစ်ချောင်သွား ဧည့်ခံတာတွေကို ၀င်စား ကိုယ်ကြိုက်တဲ့အငြိမ့်တို့တီးဝိုင်းတို့တွေ့ရင်ခဏ၀င်ကြည့်ပြီးရင်နောက်တစ်ချောင်ဆက်သွား
မရပ်မနားပါဘဲ။

ညသန်းခေါင်လောက်ကြရင် ဧရာဝတီမြစ်ကြီးကိုစီးမြင်ရတဲ့နေရာမှာထိုင် လရောင်အောက်ကမြစ်ထဲမှာ မီးဖောင်လေးတွေထွန်းထားတာကိုကြည့်ရင်း သယ်လာတဲ့စားစရာတွေကိုထုတ်လို့
စားကြသောက်ကြ စကားတွေပြောကြနဲ့ ပါ။
အဲဒါမနက်မိုးလင်းခါနီးမှ တောင်ပေါ်က အုပ်စုလိုက်ကြီးပြန်ဆင်းလာကြတာ နှစ်တိုင်းနီးပါးပါ။
နောက်ပိုင်းမှာ ဈေးချိုအဟောင်းဆယ့်နှစ်ရုံကို ဖျက်လို့ အဆင့်မြင့်ဈေးချိုကြီးဆောက်လိုက်တဲ့အချိန်ကစလို ဈေးချိုသူဈေးချိုသားတွေ စိတ်တွေပြောင်းကုန်ပါတယ်။

စစ်ကိုင်းကို ကထိန်သွားခင်းနေရတာ ရိုးသွားလို့နဲ့တူပါတယ်
ကထိန်ခင်းတဲ့နေရာတွေက မန်းလေးနဲ့ဝေးသထက်ဝေးထက်နေရာတွေကို သွားပြီးကထိန်ခင်းကြတာပါ။
အစကတော့ တောင်ကြီးအင်းလေး ပုဂံ ပုပ္ပါး အစရှိတဲ့မန်းလေးမြို့နဲ့ခပ်နီးနီး နောက်တော့ ပိုပိုဝေးတဲ့ လားရှိုး မူဆယ် နမ်းခမ်းအစရှိတဲ့ အဝေးဆုံးမြို့တွေကိုသွားလို့ ကထိန်ခင်းပါတော့တယ်။
အရင်က မြို့မောင်နှမဖြစ်ခဲ့တဲ့စစ်ကိုင်းကို မန္တလေး မြို့လုံးကျွတ်နီးပါး ကထိန်သွားခင်းတယ်လို့များ ပြောမိရင် အခုခေတ်ကလေးတွေက ယုံမယ်မထင်ပါဘူး ပုံပြောတယ်မှတ်နေမှာပါ။

အခုတော့ စစ်ကိုင်းနဲ့မန်းလေး ကထိန်ဘာမှမဆိုင်သလိုဖြစ်လို့ တန်ဆောင်မုန်းလပြည့်ဆိုရင် စစ်ကိုင်းဘက်ကူးတာ မရှိသလောက်နည်းသွားပါပြီ။
အဲတော့ ကထိန်ရက်ဆိုရင် ဧည့်ခံကြတာကလဲ အရင်လို အပြိုင်အဆိုင်မရှိကြတော့ပါဘူး ဆနွင်းမကင်းလေး စမူဆာလေး လက်ဖက်လေးနဲ့ ပြီးစလွယ်ဧည့်ခံတယ်ဆိုရုံလောက်ပါဘဲ။
နေရာထိုင်ခင်းကျဉ်းကျပ်တာကို အကြောင်းပြလို့ ပွဲခင်းတာတွေကလဲ မရှိသလောက် ဆိုတာ တကူးတက သွားကြည့်ကြတယ်ဆိုတာလဲ မရှိသလောက်ပါ။
အားလုံးရဲ့စိတ်ထဲမှာ ဈေးချိုကဆိုင်တွေကို ရက်ရှည်ပိတ်လို့ မရောက်ဘူးသေးတဲ့နေရာတွေကို ကထိန်ခင်းရင်လည်ဘို့လောက်သာ စိတ်ထဲမှာရှိကြပါတော့တယ်။
ဒါကတော့ဟိုးရှေးရှေးကတည်းကရှိခဲ့တဲ့ဈေးချိုကထိန်ပါ။

နောက်ဒီကထိန်အကြောင်းပြောရင် မန်းလေးမြို့ (26-27)လမ်းကြား 82လမ်းက ကြက်တန်းလို့ အမည်ရတဲ့ ကားပစ္စည်းရောင်းတဲ့နေရာက ကထိန်ကလဲ မန်းလေးမြို့မှာမေ့မရနိုင်တဲ့ ကထိန်ထဲမှာပါပါတယ်။အဲဒီရပ်ကွက်တည်နေရာက တကယ်တန်းပြောရင် ဘာသာခြားတွေ အများစုရှိနေတဲ့ရပ်ကွက်ကြီးပါ။
ဒါပေမယ့် ကြက်တန်းကထိန်ဆိုတာ က မန်းလေးမြို့က ကထိန်တွေထဲမှာ နာမယ်ကြီးတယ်ဆိုတဲ့ ရွှေဆိုင်တန်းကထိန်ထက် သာတယ်တောင်ပြောနိုင်ပါတယ်။

ကထိန်ရက်ဆိုရင် လေးပြလေးတန် ပိတ်လို့ အငြိမ့်တွေ စတိတ်ရှိုးတွေကို ကျင်းကြတာပါ။
(26လမ်းကနေ 28လမ်းက တောင်မြောက် 82လမ်းကနေ83လမ်းက အရှေ့အနောက်ပိတ်လို့ ကထိန်ခင်းကြတာပါ။)
နာမယ်ကြီးအငြိမ့်တွေ နာမယ်ကြီးတီးဝိုင်းတွေငှားလို့ ခမ်းခမ်းနားနားနဲ့ တိုးမပေါက်လောက်အောင်စည်ကားခဲ့ပါတယ်။

လှူဘွယ်ပစ္စည်းတွေခင်းကျင်းထားတာကလဲ တကယ့်ကို အများကြီး အားပါးတရကြီးပါ။
အခုတော့ဒါတွေဟာအိပ်မက်လို ပုံပြင်လိုဖြစ်သွားပါပြီ။
1984ခုနှစ်မတ်လမှာဦးကျားကြီးဝင်း(35)လမ်းကစပြီးလောင်လိုက်တဲ့မီးဟာမန္တလေးမြို့ရဲ့ အချက်အချာကြတဲ့ မြို့လယ်ကောင် တစ်ခုလုံးကို ၀ါးမြိုသွားခဲ့ပါတယ်။

ဒီနောက်ပိုင်းမှာ အိမ်အခွံရယ် သောကတွေရယ်သာကျန်ခဲ့တဲ့ မန်းလေးမြို့သူမြို့သားတွေတော်တော်များများက မိမိတို့ရဲ့ဘိုးဘွားပိုင်ခဲ့တဲ့မြေကို နောက်အသစ်ပြောင်းလာတဲ့ ငွေကြေးတတ်နိုင်သူလက်ကိုထိုးအပ်ခဲ့ရပါတယ်။
မြေအပိုင်မရှိသူများကလဲ သက်ဆိုင်ရာက ချပေးတဲ့ မန်းလေးမြို့သစ်ထဲကိုပြောင်းသွားတယ်ဆိုတဲ့ မြေရောင်းလိုက်တဲ့သူများကလဲ မိမိတို့မိတ်ဆွေဟောင်းတွေရှိရာအရပ်ကိုလိုက်ပြောင်းခဲ့တဲ့အတွက်
မန်းလေးမြိုသူမြို့သားတော်တော်များများဟာ ရပ်ကွက်လိုက် ဆွေမျုိုးစုလိုက်ကြီးကို မြိုသစ်ကိုရောက်သွားပါတယ်။

ဒီတော့လူဟောင်းပျောက် လူသစ်တွေရောက်လာတဲ့ရပ်ကွက်တွေမှာ အရင်လိုဘုရားပွဲတွေ ကထိန်ပွဲကျင်းပဘို့ဦးဆောင်သူလဲမရှိ စိတ်ဝင်စားသူလဲမရှိနဲ့ဖြစ်လာတဲ့အတွက်
မန်းလေးမြို့က ဘုရားပွဲ ကထိန်ပွဲတော်တော်များများက အရင်လိုမစည်ကားတော့တာတော့အမှန်ပါဘဲ။
အရင်ခေတ်တုန်းက ကြည့်စရာခံစားစရာဖျော်ဖြေမူ့ဆိုတာ တစ်ပါတ်တစ်ခါအသစ်လဲတဲ့ရုပ်ရှင်ရယ် တစ်နှစ်တစ်ခါကြည့်ရတဲ့ဇာတ်ပွဲရယ် အငြိမ့်ပွဲရယ်လောက်သာရှိခဲ့တာကိုး။

အခုခေတ်မှာတော့ ရုံတင်တဲ့ကားကိုသွားကြည့်မလား မြန်မာကားအသစ်ကို ငှားကြည့်မလား စတိတ်ရှိုးခွေတို နိင်ငံခြားကားတို့ ကိုရီးယားကားဇာတ်လမ်းတွဲတွေကို အ်ိမ်မှာခွေဝယ်ပြီးကြည့်မလား ပြည်တွင်းပြည်ပ ရုပ်သံလိုင်းကလာနေတဲ့နိုင်ငံတကာကားကိုကြည့်မလား
အင်တာနက်ကဘဲကြည့်ချင်သလားကိုယ်လိုချင်တာကိုယ် ကိုယ်ရွေးချယ်နိုင်တဲ့ အချိန်ဆိုတော့ ပွဲတွေ အငြိမ့်တွေ စတိတ်ရှိုးတွေကို လဲမမက်ကြတော့ပါဘူး။
ဒါကြောင့်လဲ တစ်ခါတစ်ရံကိုယ့်အရပ်ဘုရားပွဲဘယ်နေ့ကပြီးသွားသလဲဆိုတာတောင် မသိသူတွေရှိလာကတော့ လွမ်းဆွတ်စရာတစ်ခုလိုခံစားရပါတယ်။

နောက်ဆေးပေါင်းခတယ်ဆိုတဲ့ တန်ဆောင်မုန်းလပြည့်ညကလဲ ကျနော်တို့ မန်းလေးသားအဖို့လွမ်းစရာပါ။
တန်ဆောင်မုန်းလပြည့် နေ့ညကို “သူခိုးကာလ”လို့လဲခေါ်ပါတယ်။
အဲဒီနေ့မှာဆိုရင် မန်းလေးမြို့အနှံ့ ရပ်ကွက်တိုင်း လမ်းအပြတိုင်းမှာ” မခေါ်မုန့်လုံး” ကိုစတုဒီသာကြွေးပါတယ်။
မခေါ်မုန့်လုံး ဆိုတာကလဲ ဘယ်သူမှ အထူးတလည်မဖိတ်ဘူး စားချင်တဲ့သူလာစားဆိုတဲ့သဘောကိုဆောင်ပါတယ်။

မုန့်လုံးရေပေါ်လို့လဲခေါ်ပါတယ်။ ကောင်ညှင်းမုန့်ကို ကျိတ်ထားတာကို မုန့်နပ်အောင် ကျောက်တုံးနဲ့ဖိလို့နှပ်ထားရပါတယ်။မုန့်ညက်တွေနပ်ပြီဆိုမှ အလယ်ကောင်ကထညက်ထဲ့လို့ ၀ိုင်းနေအောင်လုံးပြီး ဆူနေတဲ့ရေနွေးအိုးထဲကိုထည့် သုံးခါမြုတ်လိုက်ပေါ်လိုက်ဖြစ်ရင်စားလို့ရပါပြီ။
မုန့်လုံးလေးတွေကို ဗန်ဒါရွက်စိမ်းစိမ်း ငှက်ပျော်ဖက်စိမ်းစ်ိမ်းလေးတွေနဲ့ထည့်လို့ အုန်းသီးခြစ်တွေဖြူးလို့ ပေးပါတယ်။
(တစ်ခါတစ်လေ အမြင်ကပ်တဲ့လူပါရင်ဖြစ်ဖြစ် ပျော်ချင်စချင်ရင်ဖြစ်ဖြစ် မိုးမျှော်ငရုတ်သီးကိုထည့်လုံးပါတယ် ငရုတ်သီးစားမိလို့စပ်သွားရင် အားလုံးကတစ်ဝါးဝါးတစ်ဟားဟားနဲ့ပေါ့)

ဟိုအရင်က အကြွေစေ့သုံးလို့ရသေးတဲ့အချိန်တုံးကတော့ မုန့်လုံးထဲကို ငါးပြားစေ့ ဆယ်ပြားစေ့ မတ်စေ့ ငါးမူးစေ့ကျပ်စေ့တွေကို ထည့်လို့လုံးပေးပါတယ်။
ဒါတွေတင်မကသေးပါဘူး တစ်ချိုအိမ်တွေက အိမ်ပေါ်ကနေပြီး ပိုက်ဆံတွေကြဲချတာကို လမ်းသွားလမ်းလာ လူကြီးလူငယ်မရွေးလုလို့ပိုက်ဆံကောက်ကြပါတယ်။
ပိုက်ဆံရတဲ့ကလေးလူကြီးမှန်သမျှ ပျော်ရတာချည်းပါဘဲ။

အဲဒီလိုနေ့မျိုးမှာ မစားမဖြစ်စားရတာကတော့ ခါးသက်သက်အရသာလေးပါတဲ့ “မဲဇလီဖူးသုပ် “ပါ။
ကြိုက်ကြိုက်မကြိုက် လူကြီးတွေက ဆေးဖက်ဝင်တယ်ဆိုပြီးဇွတ်စားခိုင်းပါတယ်။
အဲဒါထက် ဆိုးတာကတော့ ညသန်းခေါင်ရောက်တာနဲ့ အရပ်ထဲက ဆေးဆရာကြီး ပယောဂဆရာကြီး “အဘကြည်”ဆီမှာ ဆေးအထိုးခံရတာပါ။

ဒါကတော့ အန္တရာယ်ကင်းအောင်ရယ် သူများပြုစားတာမခံရအောင်ရယ်ဆိုပြီးထိုးရတာပါ။
ခေါင်းသုံးချက် လက်ဖျံနှစ်ဖက်သုံးချက်စီ ပေါင်းကိုးချက် ကြေးစုတ်တံကြီးနဲ့ထိုးပေးတာပါ။
မနက်လင်းအားကြီးပိုင်းဆိုရင် ရပ်ကွက်ထဲက တစ်ချို့သောသူများက “ပန့်သကူ” ပစ်တယ်ဆိုပြီး ပိုက်ဆံတွေကို လမ်းမှာလျှောက်ချထားတတ်ပါတယ်။
ပိုက်ဆံတွင်မကဘူး ဆန်ဘယ်နှစ်လုံးလာယူပါတို့ ဗလာစာအုပ် တို့ ပိုက်ဆံနှစ်ကျပ်လာယူပါတို့ အစရှိတဲ့စာလေးတွေရေးထားတာလေးကို ဘယ်အိမ်ကိုလာယူပါဆိုပြီး “ရွှေပေလွှာ”
ချတာတွေလည်းရှိပါတယ်။တကယ်လဲပေးပါတယ်။

ဒါပေမယ့် တစ်ခါတစ်လေတော့လဲ ခပ်နောက်နောက်လူတွေက ရပ်ကွက်ထဲမှာ တွန့်တိုတဲ့ ကပ်စေးနှဲတဲ့အိမ်နာမယ်တတ်လို့ ဂျောက်ချပြီးစတာနောက်တာလဲရှိတတ်ပါတယ်.။
ညပိုင်းရောက်ရင်တော့ ရပ်ကွက်ထဲရှိသမျှအိမ်အားလုံး အိမ်အပြင်မှာရှိတဲ့ဆိုင်းဘုတ်ပန်းအိုး ထိုင်ခုံမှန်သမျှ သိမ်းရပါတယ်။

မသိမ်းလို့က ကာလသားတွေ ဂျောက်ချလို့ ဟိုရွေ့ဒီရွေ့လုပ်တာကိုခံပေတော့ဘဲ၊
အရပ်ထဲက ရွေ့ရသမျှတွေကို ဟိုကပစ္စည်းဒီရွှေ ဒီကပစ္စည်းဟိုရွေလုပ်ပါတယ်။
လူပျုကြီးအိမ်ကို အပျိုကြီးအိမ်က ထမိန်အစုတ်ကို သွားထားချင်ထားပါတယ်။
မခေါ်မပြောနေကြတဲ့လူချင်းတောင် မနက်ခင်းရောက်လို့ ပစ္စည်းပျောက်ရှာရင်း ပြန်စကားပြောတာတောင်ရှိပါတယ်။
သူတို့ကာလာသားတွေက သူခိုးကာလလုပ်ဘို့ လူတွေအိပ်အောင်စောင့်ရင်းချက်ပြုတ်စားသောက်ကြတာကနေ မတတ်တတ်ချက်ရင်း ဆီလည်ရေလည်ဖြစ်လို့စားကောင်းတဲ့ “ကြက်သားကာလသားချက်”ကလဲ နာမယ်ကြီးဟင်းတစ်ခွက်ဖြစ်လာပါတယ်။

ဘယ်သူကစလိုက်တဲ့ဇာတ်လမ်းမှန်းတော့မသိပါဘူး။
ပျော်ပွဲစားကြေးတောင်းတယ်ဆိုတာကြီးပေါ်လာပါတယ်။
ချက်စားစရာဆန် ငရုတ်ကြက်သွန်တွေအိမ်တွေကထည့်ပေးကြပါတယ် ပိုက်ဆံထည့်သူလဲရှိသပေါ့။
အစကတော့ကလေးတွေက အပျော်သဘော အရုပ်လုပ်ပြီး ကပြီးတောင်းပါတယ်။
နောက်လူကြီးတွေကလိုက်လုပ်ပါတယ်။

အခုအချိန်မှာတော့ အရပ်ထဲမှာ ဈေးထဲမှာ တန်ဆောင်မုန်းကာလရောက်ပြီဆိုရင် အပျော်သဘောမဟုတ်ဘဲစီးပွားဖြစ်တောင်းတဲ့အနေအထားကိုရောက်လာပါတယ်။
ဆန်တွေ ဘာတွေမပေးနဲ့ မလိုချင်ဘူး ပိုက်ဆံဘဲထည့် ပိုက်ဆံတောင်နည်းနည်းမဟုတ်ဘူးများများဆိုတာမျိုးဖြစ်လာပါတယ်။
တန်ဆောင်မုန်းလပြည့်နေ့မရောက်ခင်မှာ အလှူခံတွေသောင်းကျန်းလွန်းတော့ ဆိုင်တံခါးပိတ် အိမ်တံခါးပိတ်နေရတဲ့ဘ၀ကိုရောက်လာပါတယ်။

လမ်းသွားပြီဆိုရင်လဲ လမ်းမှာ ကြိုးတွေတား တုတ်တွေတားလို့ပျော်ပွဲစားကြေးတောင်းတယ်ဆိုတာတွေဖြစ်လာပါတယ်။
ကလေးတွေကလဲ ရှိသမျှအိမ်ပေါက်စေ့လည်လို့ “ပိုက်ဆံကြဲပါဗျို့”ဆိုပြီးသံပြိုင်အော်ကြပါတယ်။
ခပ်ရိုင်းရိုင်းပြောရရင် အပျော်သဘောက နေစလိုက်တာက ကြေးစားဆန်ဆန်တွေဖြစ်ကုန်ပါတယ်။
ဒါကြီးကတော့ဘယ်သူမှ ပြောင်းလို့မရနိုင်တော့တဲ့ စရိုက်ဆိုးကြီးဖြစ်သွားပြီလို့စိတ်ထဲမှာ ခံစားရပါတယ်။
အန်းတိတ်လို့ပြောပြော ခေတ်ဆွေးကြီးလို့ပြောပြော အရင်မန်းလေးက ကထိန်တွေဘုရားပွဲတွေနဲ့ တန်ဆောင်မုန်းလပြည့်ညတွေကိုတော့ ကျနော်တကယ်ကိုလွမ်းမိပါတယ်။
ပိုလွမ်းတာကတော့ ………………………………………………………………………………………………………….

ီကိုပေါက်